Oʻzbekiston kelajagi – sogʻlom va barkamol avlod qoʻlida

Bugun mamlakatimizda yoshlar uchun yaratilayotgan sharoitlar va imkoniyatlar koʻlami chegara bilmaydi. Mustaqil fikrlaydigan, zamonaviy ilm-fan va kasb-hunarlarni puxta egallagan, oʻz yurti, oʻz xalqiga fidoyi, ajdodlarimiz boshlab bergan ishni davom ettirishga qodir boʻlgan, har tomonlama sogʻlom avlodni yengib boʻladimi, degan savolni oldimizga qoʻysak, albatta, yoʻq, deya baralla aytishimiz mumkin. Chunki oʻz maqsadlariga yetishishda, birdam va doim yangilik sari intiluvchi bunday yoshlar bizning faxrimiz va gʻururimizdir. Ular bizga kuch beradi, iftixor bagʻishlaydi.

Albatta, bugun katta umid, orzu-maqsadlar bilan, Vatanim taraqqiyotiga hissa qoʻshaman, deya belini mahkam bogʻlab maydonga chiqayotgan, shijoatli yoshlarimizni qoʻllab-quvvatlash barchamizning burchimizdir. Bu borada esa partiya tizimida “Yosh adolatchilar” qanoti, “Isteʼdodli yoshlar klubi” tashkil etildi. Unda joylarda iqtidorli yoshlarning faoliyati oʻrganilib, qoʻllab-quvvatlandi, turli tanlovlar doirasida ularning siyosiy savodxonligi rivojlantirildi. Ayniqsa, “Konstitutsiya bilimdoni” koʻrik-tanlovining tashkil etilganligi unda ishtirok etgan mingdan ortiq yoshlarimizning huquqiy taʼlim-tarbiyasini oshirib, eng muhimi, siyosiy jarayonlarda faol ishtirokini taʼminladi.

Partiyaning saylovoldi dasturida yoshlarni har tomonlama qoʻllab-quvvatlash, yosh avlodning huquq va erkinliklarini himoya qilish tizimini tubdan qayta shakllantirish, eng dolzarb muammolarini faol va samarali yechish, ularga har tomonlama yordam koʻrsatish masalalariga juda katta eʼtibor qaratilgan. Yoshlar tashkilotlari faoliyati samaradorligini oshirish, yoshlarning uy-joy va maishiy sharoitlarini yaxshilash, davlat hokimiyati va boshqaruvi organlari rahbarlari tomonidan yoshlar bilan ochiq va doimiy muloqotni oʻtkazish boʻyicha chora-tadbirlarni qoʻllab-quvvatlash tarafdori ekanligi qayd etilgan. Partiyaning ustuvor vazifasi sifatida yoshlarning huquq, erkinliklari va qonuniy manfaatlarini himoya qilish, ularni milliy va umuminsoniy qadriyatlarni hurmat qilish ruhida tarbiyalash, ularning tafakkurida mustaqillik, milliy oʻzini oʻzi anglash, Vatanga muhabbat va uning taqdiriga tegishlilik hissi, fidokorlik kabi tuygʻularni uygʻotish va yoshlarni turli mafkuraviy tahdidlardan chegaralash singari aniq vazifalar belgilab berilgan. Bu esa yangi avlodning zamon bilan hamnafas yashashida, vatanga boʻlgan mehrini oshirishda, oʻzini anglashga imkon beradi. Dasturda bildirilgan har bir maqsad va vazifada yangi avlodni tarbiyalash va ularga sifatli taʼlim tizimini yetkaza olishdan iboratdir. Chunki yangi avlodni tarbiyalash – xalqni tarbiyalash demakdir.

Yurtimizda taʼlim sohasida oʻquv muassasalarini qurish, rekonstruksiya qilish, kapital taʼmirlash borasidagi izchil ishlar davom ettirilmoqda. Ayniqsa, moddiy-texnik bazasining yangilanganligi, zamonaviy axborot kommunikatsiya texnologiyalari bilan taʼminlanganligi yoshlarimiz uchun imkoniyatlarni kengaytirdi. Mamlakatimizda yoshlar sportini rivojlantirish, ularni muntazam sport turi bilan shugʻullanib borishlari uchun ham eʼtibor kuchaymoqda. Ushbu tizim yoʻlida sport inshootlarini har tomonlama rivojlantirish va ularni zamonaviy inventarlar bilan jihozlash uchun barcha zarur sharoitlar yaratilmoqda. Bu esa ularning ham maʼnan, ham jismonan sogʻlom avlod boʻlib voyaga yetishishlari uchun asosiy boʻgʻindir. Shubhasiz, jismoniy va maʼnaviy jihatdan sogʻlom avlod bizning eng katta boyligimiz hisoblanadi. Eng muhimi, zamonaviy bilim va tafakkurga, sogʻlom dunyoqarashga ega, rivojlangan davlatlardagi tengdoshlari bilan bellashishga tayyor boʻlgan, koʻzi yonib turadigan navqiron avlodimiz katta ishonch bilan hayotga dadil kirib kelayotgani barchamizni quvontiradi. Shuning uchun ham ana shu quvonchning bardavomligi yoʻlida masʼuliyatni his etgan holda yoshlarning intellektual salohiyatini rivojlantirishga alohida eʼtibor qaratishimiz lozim. Zero, Oʻzbekiston kelajagi – sogʻlom va barkamol avlod qoʻlida.    

Muhiba Sayfiddinova,

Xalq deputatlari Samarqand shahar Kengashi deputati.