Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudovaning saylovchilar bilan navbatdagi uchrashuvi Andijon viloyatida boʻlib oʻtdi

Ayni kunlarda “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudovaning mamlakatimiz hududlari boʻylab saylovchilar bilan uchrashuvlari davom etmoqda.

Saylovoldi dasturida huquq­qiy davlat qurish, ijtimoiy adolatni va milliy iqtisodiyotimizning barqaror oʻsishini taʼminlash, ilm-fan, innovatsiya­lar va taʼlim sohasini barqaror rivojlantirish, aholi salomatligini muhofaza qilishga doir takliflarini ilgari surayotgan partiya nomzodning vodiylik saylovchilar bilan uchrashuvlari Andijon viloyatidan boshlandi.

Boy tarixga ega, koʻrkam Shahrixon tumanida tashkil etilgan uchrashuvda Oliy Majlis Qonunchilik palatasi deputatlari, partiya faollari, talaba-yoshlar, keng jamoatchilik va ommaviy axborot vositalari vakillari ishtirok etdi.

Dastlab, uchrashuvda “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudovaning bosh ishonchli vakili Inomjon Qudratov tomonidan tadbir ishtirokchilariga nomzod haqida batafsil maʼlumot berildi.

Shundan soʻng, Prezidentlikka nomzod Robaxon Maxmudova saylovchilar bilan yuzlashib, mamlakat rivoji, fuqarolar farovonligi yoʻlida amalga oshirishga qaratilgan gʻoya va maqsadlari aks etgan Saylovoldi dasturi, unda ilgari surilayotgan ustuvor yoʻnalishlar bilan ishtirokchilarni yaqindan tanishtirdi.

Taʼkidlanganidek, nomzodning Saylovoldi das­turida Vatanimiz taraqqiyoti yoʻlida huquqiy demokratik, ijtimoiy davlat va barcha uchun farovonlik taʼminlangan adolatli fuqarolik jamiyati qurishning sotsial-demokratik modeli taklif etilmoqda.

Aytish joizki, nomzod dasturida xalq davlat hokimiyatining birdan-bir manbai ekanligi haqidagi konstitutsiya­viy prinsip davlat siyosatining ustuvor yoʻnalishi sifatida taʼkid­lanib, xalq hokimiyatining yorqin timsoli boʻlmish vakillik demokratiya­si institutining roli va ahamiyatini yanada oshirish, mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyatini roʻyobga chiqarish va inson kapitalini rivoj­lantirish kabi masalalarda izchil takliflarning ilgari surilayotgani tadbir ishtirokchilarida katta qiziqish uygʻotdi.

Shuningdek, dasturda subsidiyalar berish tizimini yanada takomillashtirish va maqsadli ishlatilishi ustidan jamoatchilik nazoratini kuchaytirish, bojxona va soliq imtiyozlarini takomillashtirish, imtiyozlarni aniq sohalarga berish, hududlar oʻrtasidagi iqtisodiy bir xil oʻsishni taʼminlash, barcha tuman va shaharlarni bir maromda rivojlantirishni nazarda tutuvchi takliflar ilgari surilmoqda.

Uchrashuv davomida nomzodning Andijon viloyatidagi ishonchli vakili Maloxatxon Musayeva, Oliy Majlis Qonunchilik palatasi deputati Oltinoy Maʼmirova, xalq deputatlari Andijon shahar kengashi deputati Oʻtkirbek Arziqulov va partiya faoli Oysuluv Oʻroqovalar soʻz olib, Prezidentlikka nomzod Robaxon Maxmudovaning Saylovoldi dasturi yurtparvar gʻoya va maqsadlar jamlanmasi ekanligini eʼtirof etish barobarida, yigʻilganlarni kutilayotgan muhim siyosiy tadbirda Robaxon Maxmudovaga ovoz berishga chaqirdi.

Tadbir yakunida Prezidentlikka nomzod Robaxon Maxmudova saylovchilarning savollariga aniq va batafsil javob berdi.

Oʻzbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

“Adolat” SDP

Andijon viloyat  kengashi Matbuot xizmati.