Oʻzbekiston – yoshlar mamlakati!

Soʻnggi yillarda yoshlarni har tomonlama qoʻllab-quvvatlash borasida qator meʼyoriy-huquqiy hujjatlar ishlab chiqildiki, ular yoshlarning intilish va iqtidorini qoʻllab-quvvatlash, ragʻbatlantirishda, rahbar kadrlarning boshqaruv salohiyatini yuksaltirishda mutlaqo yangi tizimni shakllantirdi.

Bugun yurtimizda yoshlarning huquq va manfaatlarini himoya qilish, ularga zarur shart-sharoitlar va imkoniyatlarni yaratib berish borasida mustahkam huquqiy baza yaratilgan va bu tizim zamon talablariga hamohang ravishda takomillashtirib borilmoqda. Xususan, bugungacha parlament tomonidan yoshlarga oid 40 dan ziyod qonun hujjatlari qabul qilingan boʻlib, 30 dan ortiq xalqaro huquqiy hujjatlar ratifikatsiya qilingan.

Yurtboshimiz Shavkat Mirziyoyevning Oʻzbekiston Respublikasi Prezidenti sifatida birinchi imzolagan qonun hujjati – 2016-yil 14-sentyabrdagi “Yoshlarga oid davlat siyosati toʻgʻrisida”gi Qonun ekanida ham ramziy mazmun-mohiyat mujassam.

Oʻzbekiston “Adolat” SDP ham mamlakatda yoshlarni huquqiy va ijtimoiy muhofaza qilish, isteʼdodini qoʻllab-quvvatlash masalalarini izchillik bilan samarali amalga oshirish tarafdori.

Partiya shu maqsadda turli tadbirlarni tashkil etib kelmoqda.

Islom Karimov nomidagi Toshkent davlat texnika universiteti Olmaliq filialida oʻtkazilgan navbatdagi tadbir ham shular jumlasidandir.

Oʻzbekiston “Adolat” SDP Olmaliq shahar Kengashi, Islom Karimov nomidagi Toshkent davlat texnika universiteti Olmaliq filiali Korrupsiyaga qarshi kurashish “Kompleans nazorat” tizimini boshqarish boʻlimi oʻzaro hamkorligida tashkil etilgan profilaktik tadbirda oliygoh “Konchilik ishi” fakulteti professor-oʻqituvchilari hamda talabalari ishtirok etishdi.

“Biz taʼlim olayotgan muassasada korrupsiyaga oʻrin yoʻq!” va “Oʻzbekiston – yoshlar mamlakati!” shiori ostida oʻtkazilgan profilaktik tadbirda partiya Olmaliq shahar Kengashi raisi Faxriddin Hoshimov maʼruza qildi.

Uning maʼruzasida taʼkidlanganidek, “-Vatan taqdiriga daxldor ekanligini his qilib yashash va berilayotgan imkoniyatlardan unumli foydalanish har bir Oʻzbekiston farzandining muqaddas burchidir.

Mamlakatimizda oliy taʼlim sohasidagi islohotlar va imkoniyatlar yigit-qizlarning malakali mutaxassis boʻlib hayotga kirib kelishida muhim omil boʻlmoqda.

Yurtboshimizning jamiyatni “halollik vaksinasi bilan emlash” zaruriyati haqidagi fikrlari bu boradagi ishlarni samarali tashkil etishning debochasi boʻldi.

Buning yorqin isbotini soʻnggi yilllarda sohaga oid qabul qilingan konseptual ahamiyatga ega normativ-huquqiy hujjatlar, korrupsiyani oldini olishga qaratilgan maʼmuriy islohotlar misolida ham koʻrish mumkin.

Xususan, aynan Shavkat Mirziyoyev tashabbusi bilan qabul qilingan 2017 – 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi korrupsiyaga qarshi kurashishning samaradorligini oshirishda muhim ahamiyatga ega boʻlgan edi.

Aytish joizki, davlatimizning korrupsiyaga qarshi yoʻnaltirgan barcha islohotlari fuqarolarning huquq va manfaatlarini koʻzlab amalga oshirilmoqda.

Ayniqsa, Oliy taʼlim sohasida korrupsiyaga qarshi kurashish dolzarb masala ekanligiga ham jiddiy eʼtibor qaratilmoqda.

Oliy taʼlim tizimida korrupsiyaga nisbatan murosasiz munosabatni shakllantirish orqali mustaqil fikrlaydigan, yuksak maʼnaviy-axloqiy fazilatlarga ega, raqobatbardosh kadrlarni tayyorlash masalasiga jiddiy yondashilmoqda.

Natijada, oliy taʼlim muassasalariga kirish imtihonlari shaffoflashdi. Qabul imtihonlaridagi kirish ballarining sunʼiy koʻtarilishiga chek qoʻyildi. Bilimli abituriyentlarning talaba boʻlish imkoniyati ortdi. Oliy taʼlimga qamrov darajasi ham yil sayin ortib, hamma uchun teng imkoniyat va sharoitlar yaratildi.

Yaqinda qabul qilingan, mamlakatimizning yangi taraqqiyot bosqichida oldimizda turgan eng muhim ustuvor vazifa va maqsadlarni oʻz ichiga olgan “Oʻzbekiston – 2030” strategiyasida ham davlat va jamiyat rivoji uchun asos boʻlgan ustunlarni ichdan yemiruvchi illat boʻlgan korrupsiyaga qarshi kurash masalasiga alohida eʼtibor qaratildi”.

Tadbirda soʻz olgan oliy taʼlim muassasasi talabalari ham mamlakatda yoshlarga oid davlat siyosatini izchil amalga oshirish, yosh avlodni har tomonlama yetuk va barkamol, intellektual salohiyatli, oʻz qatʼiy pozitsiyasiga ega, yurtda amalga oshirilayotgan islohotlarga befarq boʻlmagan, yurtning ertangi munosib kelajagi uchun daxldorlikka tayyor, maqsadga intiluvchan, sergʻayrat, vatanparvar, sadoqatli, komil shaxslar sifatida tarbiyalashda amalga oshirilayotgan tub islohotlarni eʼtirof etishdi. Yoshlarga qaratilgan eʼtibor va gʻamxoʻrlik Oʻzbekistonni dunyoning eng rivojlangan davlatlari safidan oʻrin olishining muhim omili boʻlayotganini taʼkidlashdi.

Korrupsiyadan xoli boʻlgan oliy taʼlimning yaratilgani esa ularga kasb egallab, yetuk mutaxassis boʻlib yetishishlariga keng imkoniyatlar eshigini ochib berganini alqashdi.

Oʻzaro ochiq muloqot, erkin fikrlar almashinuvi ruhida oʻtgan tadbir barchada iliq taassurot qoldirdi.

“Adolat” SDP

Toshkent viloyat kengashi Matbuot xizmati.