Obodlik koʻngildan boshlanadi

Respublikamiz boʻylab bahor nafasi, qolaversa, Navroʻz shukuhi kezib yuribdi. Butun olamda uygʻonish va jonlanish yuz bermoqda. Bu qutlugʻ kunlarda yurtimizda xayriya hasharlari tashkil etilib, shaharu qishloqlar, mahalla-yu koʻchalar yanada obod qilinmoqda.

Xususan, 18-mart kuni Umumxalq xayriya hasharining eʼlon qilinishini barcha yurtdoshlarimiz qatori Jizzax viloyati ahli ham, shu jumladan, Oʻzbekiston “Adolat” SDP Jizzax viloyat Kengashi xodimlari ham koʻtarinki kayfiyatda qarshi olishdi.

Shu kuni partiya apparati xodimlari va partiya faollari oʻziga biriktirilgan hududdagi xayriya hasharida faol ishtirok etib, umumxalq xayriya hashariga oʻzining munosib hissasini qoʻshdi.

— Mamlakatimizda bahoriy ayyomi boʻlgan Navroʻz Umumxalq xayriya hasharlari bilan boshlanishining oʻziyoq xalqimizning pokiza va saranjom sarishta ekanidan dalolat beradi, deb oʻylayman, — deydi “Adolat” SDP Jizzax viloyat Kengashi raisi Orif Shukurov. – Hasharlar elimizning azaliy ezgu odatlaridan biridir. Biz ham jamoamiz bilan ushbu tadbirda faol ishtirok etib, yurtimizdagi tozaligu farovonlikka ozgina boʻlsa-da, oʻz ulushimizni qoʻshishga harakat qildik.

Koʻtarinki, bayramona kayfiyat bilan boshlangan ish natijasiz qolmadi, albatta. Jamoa aʼzolari tomonidan ellikdan ortiq manzarali va mevali daraxtlar ekildi. Bu kabi ishlar partiyamizning shahar va tuman Kengashlarida ham jonbozlik bilan oʻtkazilmoqda.

Birdamlik va saxovat ayyomi boʻlgan Navroʻz xalqimizni hashar kabi umumxalq tadbirlarida yanada jipslashtiradi, nafaqat koʻchayu manzillarni, balki koʻngillarni ham obod etadi.

 “Adolat” SDP Jizzax viloyat Kengashi

Matbuot xizmati.