Oila mustahkamligini taʼminlashga barcha masʼul

“Adolat” SDP Kitob tuman Kengashi va tuman hokimligi hamkorligida Surum qishloq fuqarolar yigʻinida “Oila mustahkamligi davlat va jamiyat eʼtibori markazida” mavzusida davra suhbati tashkil etildi.

Tadbirda oila institutiga tegishli boʻlgan normativ-huquqiy hujjatlarning tahlili, bu boradagi huquqni qoʻllash amaliyoti xususida soʻz yuritildi. Shuningdek, rivojlangan xorijiy davlatlar tajribasini oʻrganish, mamlakatimiz hayotida roʻy berayotgan oʻzgarishlarga muvofiq tarzda, koʻzda tutilgan qonun hujjatlari, “Oila kodeksi”ni yanada takomillashtirish yuzasidan takliflar bildirildi.

    -Mamlakatimizdagi har bir oila – avlodlar davomiyligi, qadriyatlar, urf-odatlar va anʼanalarni, qolaversa, xalqimiz maʼnaviy merosining avloddan avlodga oʻtishini taʼminlovchi omildir. Har bir inson oila muhitida maʼnaviy jihatdan kamolga yetar ekan, oilaning barqarorligi, tinchligi, mustahkamligi va farovonligi jamiyat taraqqiyotining eng asosiy shartlaridandir. Zero, oila har bir inson uchun orzu va havaslari, maqsad va intilishlari, muddaolarini birlashtiradigan, quvonchli yoki mushkul vaziyatlarda suyana oladigan kichik bir vatan hisoblanadi. Oilalardagi hamjihatlikni taʼminlash, bu borada ayollarga psixologik va amaliy koʻmak berish maqsadida “Adolat” SDP faollari tomonidan keng qamrovli ishlar olib borilyapti. Hozirgacha 30 dan ortiq mahallalardagi 2,5 mingga yaqin oilalarda boʻlib xonadon sohiblari bilan muntazam yuzma-yuz muloqot uyushtirdik. Uchrashuvlarda har bir oila davlat muhofazasida ekanligi tushuntirildi.Oʻzbekistonda olib borilayotgan jamiki islohotlardan koʻzlangan asosiy maqsad ham mamlakatimizda umrguzaronlik qilayotgan har bir insonning baxtli yashashini taʼminlashdan iboratdir,- dedi xalq deputatlari Kitob tumani Kengashi deputati Muqaddas Murodova.

Tadbirda soʻzga chiqqan partiya faollari Shahzoda Aliqulova, Bahriddin Egamberdiyev va boshqalar oilalarning baxtli yashashi uchun qulay shart-sharoit yaratish, xususan, ularni uy-joy bilan taʼminlash, turli ijtimoiy yordam va imtiyozlar berish orqali imkoniyat yaratish qoʻllab-quvvatlash maqsadida amalga oshirilayotgan ishlar oʻta muhim boʻlib, kelgusida oʻz ijobiy natijasini berishi shubhasiz ekanligini qayd etdilar.

    Najmiddin Toʻrayev, partiya faoli.