Partiya elektorati vakillari bilan uchrashuv oʻtkazildi

Oʻzbekiston “Adolat” SDP Qoraqalpogʻiston Respublikasi Kengashi tomonidan 30-aprel kuni oʻtkaziladigan umumxalq referendumi munosabati bilan yangi Konstitutsiyaning mazmun-mohiyatini xalqimizga keng tanishtirish maqsadida barcha shahar va tumanlarda targʻibot tadbirlari oʻtkazilib kelinmoqda.

Ana shunday tadbirlarning biri joriy yil 14-aprel kuni Taxiatosh tumanida joylashgan “Taxiatosh don mahsulotlari” aksiyadorlik jamiyatida “Yangilanayotgan Konstitutsiya – inson qadri uchun” mavzusida targʻibot tadbiri tashkil etildi.

Tadbirda partiya Qoraqalpogʻiston Respublikasi Kengashi raisi Nurlibay Qaipbergenov, partiya hududiy Kengashi raisi oʻrinbosari Rauaj Otarbaev va partiya elektorati vakillari boʻlgan ushbu aksiyadorlik jamiyati xodimlari hamda ommaviy axborot vositalari vakillari ishtirok etishdi.

Tadbirni partiya Qoraqalpogʻiston Respublikasi Kengashi raisi Nurlibay Qaipbergenov kirish soʻzi bilan ochib berdi va boshqarib bordi.

Dastlab partiya Qoraqalpogʻiston Respublikasi Kengashi raisi oʻrinbosari Rauaj Otarbaev soʻzga chiqib, Yangilanayotgan Konstitutsiyamizning matni “Inson-jamiyat-davlat” gʻoyasi asosida yozilganligini alohida taʼkidladi. Yangilanayotgan Konstitutsiyamizda kambagʻallikni qisqartirish, bandlikni taʼminlash, ishsizlikdan himoya qilish boʻyicha davlat oʻziga qator yangi majburiyatlarni olishi belgilangan. Unga koʻra, yangi Konstitutsiyamizda har kim munosib mehnat qilishi, kasb va faoliyat turini erkin tanlashi, xavfsizlik talablariga javob beradigan qulay mehnat sharoitlarida ishlashi bosh qomusimizda yaqqol belgilab berilgan.

Tadbir davomida partiya Qoraqalpogʻiston Respublikasi Kengashi raisi Nurlibay Qaipbergenov yangilanayotgan Konstitutsiya jamiyatning rivojlanishi uchun zamon talabidan kelib chiqayotgan hayotiy zarurat ekanligini va 30-aprel kuni oʻtkaziladigan umumxalq referendumi yurtimizning muhim siyosiy jarayonlaridan bir ekanligini eʼtirof etdi.

Tadbir yakunida ishtirokchilar oʻzlarining qiziqtirgan savollariga javoblar olishib, fikr va mulohazalar tinglandi.

Oʻzbekiston “Adolat” SDP
Qoraqalpogʻiston Respublikasi
Kengashi matbuot xizmati