Partiya loyihasi tibbiyotda zamonaviylikka qaratilgan

“Adolat” SDPning “Sogʻlom oila-sogʻlom jamiyat-porloq kelajak” loyihasi aholi salomatligini mustahkamlash va tibbiy madaniyatni yuksaltirishga qaratilgan. Ayni shu maqsadda jamoatchilik orasida targʻibot tadbirlari tashkil etish orqali fuqarolarni oʻz salomatliklariga eʼtiborli boʻlishga chaqirayotgan xoʻjaobodlik partiyadoshlarimiz tibbiyot xodimlari bilan hamkorlikda ish olib bormoqda.

Tuman partiya kengashi qoshidagi “Ayollar qanoti” tomonidan Ibn Sino nomidagi tibbiyot kollejida aholining tibbiy madaniyatini oshirish va sogʻliqni saqlash tizimiga zamonaviy axborot-kommunikatsiya texnologiyalarini joriy etish mavzusidagi davra suhbati ham ayni shu maqsadga qaratildi. Tadbirda bugungi tibbiyot, zamonaviylik va tibbiy madaniyat haqida soʻz yuritildi. Sohaga zamonaviy axborot-kommunikatsiya texnologiyalarini joriy etilishi kasalliklarni erta aniqlash va sogʻlomlashtirishda ijobiy natija berayotgani taʼkidlandi.

Yigitali Bekboyev, “Adolat” SDP Xoʻjaobod tuman kengashi raisi:

-Safimizda tibbiyot xodimlari koʻpchilikni tashkil etadi. Bu aholi salomatligi yoʻlida olib borayotgan ishlarimizning samaradorligini oshirmoqda. Bugungi tadbirda soha faollari bilan birga boʻlgʻusi tibbiyot xodimlari ishtirok etdi. Davra suhbati yakunida birgalikda jamoatchilik orasida targʻibot ishlarini olib borishga qaror qilindi.

“Adolat” SDP Andijon viloyati kengashi

Matbuot xizmati.