Pаrtiyadoshimiz— salohiyatli kadrlar safida

Yaqinda Oʻzbekiston Respublikasi Prezidenti huzuridagi Davlat xizmatini rivojlantirish agentligi Namangan viloyat tomonidan 84 kishidan iborat salohiyatli kadrlar zaxirasi shakllantirilib, ularning oʻquvi tashkil etildi. Yosh, shu bilan birga muayyan tajribaga ega, iqtidorli mutaxassislarning bilimlarini oshirish, kasbiy koʻnikmalarini rivojlantirish maqsadida davlat organlari va tashkilotlarning hududiy boʻlimlarida ish oʻrgandilar. Keyingi bosqichda esa mahalliy hokimliklar negizida stajirovka tashkil etildi. Eʼtiborga molik jihati shundaki, istiqbolli kadrlar zaxirasiga kiritilganlar orasida partiyadoshlarimiz ham bor. Ulardan biri — Dilshod Boltaboyevdir. Mutaxassisligi boʻyicha iqtisodchi boʻlgan bu yigit mehnat faoliyatini bank muassasalarida boshlagan. Oʻshanda partiyamizga aʼzo boʻlgan. “Adolat” SDP viloyat kengashida ishlagan. Bir muddat Norin tuman partiya kengashini ham boshqardi. Oʻtgan yil boshida esa Dilshod oʻzi uchun yangi boʻlgan sohada ish boshladi. U Norin tumanidagi “Otbozor” mahallasiga hokim yordamchisi vazifasiga tayinlandi. Bu yerda partiya tashkilotlarida ishlagan paytida orttirgan koʻnikmalari qoʻl keldi. Odamlar bilan muomala qilish, muammolarni aniqlash va yechimini topish, tashkilotchilik qobiliyati qoʻyilgan vazifalarni muvaffaqiyatli bajarishda muhim ahamiyat kasb etdi.

Dastlab mahallada aholini toʻla xatlovdan oʻtkazdim, — deydi D.Boltaboyev. — Bunda faollar katta yordam koʻrsatishdi. Sharoitni oʻrganib, odamlar bilan suhbatlashgach, hududni ijtimoiy-iqtisodiy rivojlantirishning omillarini aniqlab oldik. Bular xizmat koʻrsatish va dehqonchilikdan iborat boʻldi. Tadbirkorlik bilan shugʻullanishni istaganlar ayniqsa, diqqat markazida boʻldi. Kredit, subsidiya ajratish orqali qanday natijalarga erishish mumkinligi alohida tahlil etildi. Dehqonchilik ilmidan xabardor boʻlganlarga gʻalladan boʻshagan maydonlardan yigirma sotixdan berildi.

Malika Fozilova, Muqaddam Abdusalomova, Nasiba Xoliqova kabi oʻnlab fuqarolar tovuqchilik bilan shugʻullanish istagini bildirdilar. Ularga 50 boshdan tovuq va yetarli miqdorda ozuqa sotib olishlari uchun subsidiya ajratilishi taʼminlandi. 69 kishi issiqxonalar tashkil etdi. Oʻnlab ayollar chok mashinalariga ega boʻldilar. Bularning hammasi davlat tomonidan berilgan subsidiya hisobiga amalga oshirildi. Barcha kam taʼminlangan xonadonlarda oʻzining turmush farovonligini taʼminlash uchun imkoniyatlar taqdim etildi. Ish qidirib yurgan 194 fuqaroning bandligi taʼminlanganligi ham katta yutuq boʻldi. Dilshod Boltaboyev hokim yordamchisi boʻlib ish boshlaganidan beri “Otbozor”da jiddiy oʻzgarishlar yuz berdi. Yana raqamlarga murojaat qilsak. Tadbirkorlik subyektlari koʻpayib, 223 taga yetdi. Oilaviy tadbirkorlik bilan shugʻullanuvchilarning oʻzigagina 705 million soʻmlik kredit mablagʻlari ajratildi. 140 nafar fuqaro Prezident qarorlariga muvofiq auksion orqali 10 va 15 sotixli yer maydonlari sotib oldi. Qisqasi, mahalla ahli hokim yordamchisining faoliyatidan nihoyatda xursand. Chunki uning tashabbuskorligi, gʻayrati va harakati bilan roʻy berayotgan oʻzgarishlar koʻzga yaqqol tashlanib turibdi. Bularning barchasi biz, partiyadoshlarni ham mamnun qilmoqda. “Adolat” SDP aʼzosini nomini sharaflab kelayotgan hokim yordamchisi Dilshod Boltaboyevga olijanob faoliyatida yangi zafarlar tilaymiz.

Nurbek Abdullayev,

“Adolat” SDP Namangan viloyat

Kengashi matbuot kotibi.