Partiyadoshimizning ibratli oilasi

Yangiqoʻrgʻondagi Madaniyat markazida 15-may — “Xalqaro oila kuni” munosabati bilan “Yangi Oʻzbekistonning ibratli oilasi” shiori ostida “Ibratli oila” koʻrik-tanlovining tuman bosqichi boʻlib oʻtdi. Ishtirokchilar — mahallalar va sektorlar kesimidagi bahslarning gʻoliblari 3 ta shart asosida bellashdilar. Tadbir milliy urf-odatlar va qadriyatlar asosida koʻtarinki ruhda oʻtkazildi. Eʼtiborga loyiq jihati shundaki, gʻoliblik shohsupasini egallaganlar orasida partiyadoshimiz Mirzarahmat Olimov va uning oilasi ham bor. Ular faxrli ikkinchi oʻrinni egallab, tashakkurnoma hamda maxsus esdalik sovgʻalari bilan taqdirlandilar.

- Inson borki, oilada tugʻiladi, voyaga yetadi, — deydi I. Olimov. — Men shuning uchun bu boradagi qadriyatlarni gʻoyat qadrlayman. “Adolat” SDPning gʻoya va maqsadlarida ham mazkur masala keng oʻrin olganligi maʼlum. Chunki oilalardan jamiyat tashkil topadi. Hayot baxtli va farovon boʻlishi uchun har birimiz harakat qilishimiz lozim.

Bular quruq gap yoki qizil soʻzlar emas. Mirzarahmat Olimov bilan Mahliyo Mamadaliyeva turmush qurganlariga 20-yil boʻldi. Ikki qiz va bir oʻgʻillari bor. Hozirda “Radivon” mahallasidagi eng baxtli oilalardan biri.

Xonadon egalari tongda quyoshdan oldin, yerdan tun pardasini koʻtarib ulgurmay, yorugʻ tushmay uygʻonishga odatlanishgan. Ertalabdanoq hammaning rejada belgilangan yumushi bor. Kimdir tozalik bilan mashgʻul boʻlsa, boshqasi sigir sogʻishi, birovi nonushta tayyorlashi lozim. Hovlidagi ekinlar bilan shugʻullanish ham zarur ishlardan biri. Axir bu xonadonda qishloq xoʻjalik mahsulotlarining bari hovlining oʻzidan chiqarilishi kerakda.

Shundan soʻng, belgilangan ishlar ohiriga etkazilgach oila aʼzolari bir dasturxon atrofida jam boʻladilar. Nonushtadan soʻng hamma yana ishga, oʻqishga, maktabga otlanadilar.

Oilaning katta farzandi Gulruh Moʻydinova Namangan davlat universitetining Yurisprudensiya fakultetining 1-bosqich talabasi. Darsdan boʻsh vaqtida esa oʻquv markazida abituriyentlarga ingliz tilidan saboq beradi. Shaxmat boʻyicha viloyat, respublika musobaqalarining gʻolibi, bir qancha medallar sohibi.

Oysha Moʻydinova esa mahalladagi 52-maktabning 10-sinf oʻquvchisi. ayni vaqtda tibbiyot akademiyasiga kirish uchun qizgʻin tayyorgarlik koʻrmoqda.

Kenjatoy Ollohor Moʻydinov 10-maktabning 4-sinf oʻquvchisi. keyingi yildan oʻqishni prezident maktabida davom ettirmoqchi.

Ona boʻlmish Mahliyo Mamadaliyevaga uyda ish yetarli. Roʻzgʻor yumushlari uning zimmasida. Yana vaqt topib hayvonlarga, tomorqaga qarashga ham ulguradi. mahallada oʻzining pazandaligi, non-u patir, somsa-yu qatlamalarga ustaligi bilan nom chiqargan desak, sira mubolagʻa emas.

Xonadon boshligʻi Mirzarahmat Olimov ayni vaqtda “Adolat” SDP Namangan shahar Kengashining raisi. ish faoliyati davomida oʻz bilimi, tashkilotchiligi, har bir ishga masʼuliyat bilan yondashishi bilan Hamkasblari orasida hurmat qozongan. Oʻzining intizomi, muomala madaniyati bilan ham boshqalarga namuna boʻlib kelmoqda. Zimmasidagi ishni hamisha aʼlo darajada uddalab kelgan.

Dam olish kunlarini oila aʼzolari bogʻda oʻtkazishadi. Uzum parvarishlash, sohibkorlikda ham nom qozonishgan. Qishloqda eng sara uzumlarni shu oila yetishtirishini koʻpchilik tan oladi.

Nurbek Abdullaev,

 “Adolat” SDP Namangan viloyat

Kengashi matbuot kotibi.