Plenum tanqidiy-tahliliy ruhda o‘tdi

Oʻzbekiston “Adolat” SDP Surxondaryo viloyat Kengashining onlayn XV plenumi boʻlib oʻtdi. Plenumda viloyat Kengashi ijroiya qoʻmitasining oʻtgan yildagi faoliyati va 2022-2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturidan kelib chiqadigan joriy yildagi ustuvor vazifalari tahlil etildi.

Plenumni partiya viloyat Kengashi raisi R. Hamrayev ochdi va olib bordi.

Tadbirda so‘z olganlar, partiyaning viloyat Kengashi 2022 yilda partiyaning dasturiy vazifalarini amalga oshirishda partiya elektorati va aholining keng qatlami bilan yuzma-yuz muloqotlar tashkil etib partiya faollarining siyosiy bilimlari va faolligini oshirishga alohida eʼtibor qaratilganligini ta‘kidladilar.

Hisobot davrida partiya aʼzolari soni 6.113 nafarga koʻpayib, umumiy aʼzolar soni 49862 nafarni, boshlangʻich partiya tashkilotlari soni esa 460 tani tashkil qildi.

Shuningdek «Bir oyda — bir ish oʻrin» loyihasi doirasida jami 98 nafar xotin-qizlar va yoshlar ish bilan taʼminlandi. “Bir adolatchi – yuz ayolga himoyachi” loyihasi doirasida xotin-qizlarni turli xil tazyiq va zoʻravonliklardan himoyalash maqsadida “Аyollarni zoʻravonliklardan himoyalaymiz!” mavzularida jami 41 marotaba uchrashuvlar tashkil etilib, 750 nafar xotin-qizlar bilan suhbatlar olib borildi. Suhbatlar davomida xotin-qizlarga “Himoya orderi”ni berish tartiblari tushuntirildi.

Shuningdek, Xalq deputatlari mahalliy Kengashlarda faoliyat yuritayotgan partiya deputatlari tomonidan 300 dan ortiq deputatlik soʻrovlari chiqarildi. Xalq deputatlari mahalliy Kengashlaridagi “Аdolat” SDP deputatlik guruhlari tomonidan tuman-shahar Kengashlari koʻrib chiqish uchun doimiy komissiyalarga 28 ta, sessiyalarga esa 27 ta masalalar kiritildi. Natijada sessiya va doimiy komissiyaga kiritilgan masalalardan kelib chiqib, aniqlangan kamchiliklarni oʻz vaqtida bartaraf etish yuzasidan masʼul mansabdor shaxslarga aniq topshiriqlar berildi hamda Kengashning tegishli komissiya tomonidan qarorlar ijrosi nazoratga olinishi belgilandi.         

Sessiyalarga masalalar kiritish boʻyicha partiyaning xalq deputatlari Termiz shahar (4 ta), Termiz tumani (4 ta), Sherobod tumani (3 ta),  Jarqo‘rg‘on tumani  (5 ta),  Sariosoyo tumani (6 ta) deputatlik guruhlari faol boʻldilar. Biroq partiyaning qolgan tumanlarining deputatlik guruhlari faoliyati samaradorligi past boʻlganligi aytib o‘tildi.

Ma‘ruzachilar tomonidan yuqoridagi masalalar muhokama etilar ekan partiya faoliyatini jonlantirish, aholining keng qatlami orasiga kirib borish, joriy yilda oʻtgan davrga nisbatan koʻproq natijaga erishish zarurligiga urg‘u berildi. Plenum yigʻilishi davomida kun tartibiga kiritilgan masalalar yuzasidan qarorlar qabul qilindi.

Gulshod Tursoatova,

O‘zbekiston «Adolat» SDP Surxondaryo viloyat Kengashi matbuot kotibi.