Prezidentimiz maʼruzasi xalqaro va mintaqaviy taraqqiyotning dolzarb muammolarini hal etishga xizmat qiladi

Tinchlik – buyuk neʼmat. Inson barcha orzu istaklariga faqat osoyishta hayot orqali erishadi. Zero, tinchlik bor joyga toʻyu tantanalar, shodlig-u xurramlik yarashadi. Istiqlol yillarining oʻtgan 32 yili mobaynida biz shuni angladikki, ota – bobolarimizning “Qoʻshning tinch, sen tinch”, degan gapi rosa topib aytganligini yanada chuqurroq tushunib etdik. Jumladan, Oʻzbekiston Respublikasi Prezidenti Shavkat Mirziyoyev Birlashgan Millatlar Tashkiloti Bosh Assambleyasi 78-sessiyasidagi nutqini tinglar ekanman, davlatimiz yetakchisi tomonidan ushbu sessiya ishtirokchilariga havola etilgan 10 ga yaqin hayotiy tashabbuslar, nafaqat mintaqamiz, balki dunyo xalqlari talab-ehtiyojlarini koʻzlab ilgari surilganligiga amin boʻldim.

Davlatimiz rahbari oʻz nutqida Oʻzbekiston bundan buyon ham Markaziy Osiyoda yaxshi qoʻshnichilik, barqarorlik, oʻzaro hamkorlik va rivojlanish muhitini mustahkamlash yoʻlidan qatʼiy borishini qayd etganligi yuqoridagi fikrimizning isbotidir. Yurtimiz va barcha qoʻshnilarimiz birgalikdagi saʼy-harakatlar tufayli davlat chegaralari, transport koridorlari va suvdan foydalanish boʻyicha muammolarni bartaraf etishga muvaffaq boʻldi. Mintaqa davlatlari oʻrtasida oʻzaro savdo ikki yarim barobardan ziyod, qoʻshma korxonalar soni esa besh marta oʻsdi. Mintaqamiz iqtisodiy rivojlanish markaziga, Sharq va Gʻarbni, Shimol va Janubni bogʻlaydigan transport-kommunikatsiya koʻprigiga aylanib, unga qiziqish tobora ortib bormoqda.

– Bizga tinch va barqaror, mintaqaviy hamkorlik jarayonlarida ishtirok etadigan, qoʻshnilari va boshqa mamlakatlar bilan oʻzaro manfaatli sheriklik uchun ochiq Afgʻoniston kerak, – dedi davlatimiz rahbari.

Oʻzbekiston Prezidenti BMTning yuksak minbaridan turib dunyo hamjamiyatini Afgʻoniston muammosini hal etish yoʻlida birlashishga va bu borada Birlashgan Millatlar Tashkiloti rahnamoligida Afgʻoniston boʻyicha birgalikda ishlab chiqilgan, vaziyatga moslashuvchan va konstruktiv pozitsiyani belgilashga chaqirganligi va ushbu xalqqa insonparvarlik yordami koʻrsatishni susaytirmaslik lozimligi boʻyicha bildirgan fikrlari jahon hamjamiyati diqqat-eʼtiborini mavjud global muammolarni hal etishga undashi shubhasiz.

 Nosirjon Egamberdiyev,

“Adolat” SDP Guliston shahar Kengashi deputati.