Prezidentning vodiyga amaliy tashrifidan oʻz oldimizda turgan vazifalarni belgilab oldik

Davlatimiz rahbari Shavkat Mirziyoyev joylarda ijtimoiy-iqtisodiy islohotlarning borishi, amalga oshirilayotgan bunyodkorlik va obodonlashtirish ishlari, yirik loyihalar bilan tanishish, xalq bilan muloqot qilish maqsadida vodiy viloyatlarida boʻlgani hudud aholisining koʻplab muammolariga ijobiy yechim topib bergani bilan gʻoyat ahamiyatli boʻldi.

Oltin vodiyga dastlabki tashrif Andijon viloyatidan boshlandi. Bu yerda yurtboshimiz qayta tiklanuvchi energiya manbalarini ommalashtirish va aholi bandligini taʼminlash choralari boʻyicha yigʻilish oʻtkazdi. Vodiyda iqtisodiyotning oʻsishi va aholi soni ortgani sayin elektr energiyasi isteʼmoliga boʻlgan talab ham oshib, 40 foizga koʻpaygandi.

Mamlakatimiz rahbari Shavkat Mirziyoyevning vodiyga bu galgi tashrifi chogʻida partiyamiz oʻz saylovoldi dasturida ustuvor vazifa sifatida koʻrgan mamlakat iqtisodiyotida energiyani tejovchi texnologiyalarni keng joriy qilish, qayta tiklanadigan energiya manbalariga oʻtish masalasiga katta eʼtibor qaratildi.

Bunday sharoitda eng toʻgʻri yechim qayta tiklanuvchi energiya manbalarini koʻpaytirish lozimligi xususida toʻxtalgan yurtboshimiz quyosh va shamol stansiyalari loyihalarini koʻzdan kechirib, yirik korxonalarda ham qayta tiklanuvchi energiya manbalaridan foydalanish, umuman, ularni elektr bilan oʻzini oʻzi taʼminlashga oʻtkazish kerakligini taʼkidladi.

Bu yil Pop va Fargʻona tumanlarida 600 Megavattli 2 ta quyosh stansiyasi qurilishi rejalashtirilgani, Andijonda 41 ta, Namanganda 32 ta va Fargʻonada 27 ta mikro gidroelektr stansiya qurish imkoniyati borligini qayd etdi.

Ijtimoiy obyektlarda quyosh energiyasidan foydalanish uchun alohida kompaniya tashkil etilishini belgilab berdi.

Energiya resurslarini iqtisod qilish choralarini koʻrsatib oʻtdi. Mutasaddilar oldiga aholining quyosh energiyasidan foydalanishi uchun jozibador tizim yaratish vazifasini qoʻydi. Bu borada oʻz koʻrsatma va tavsiyalarini berdi.

Eʼtibor beradigan yana bir muhim jihatga diqqatingizni qaratmoqchiman, Prezidentimiz oʻzining Oliy Majlis va Oʻzbekiston xalqiga yoʻllagan Murojaatnomasida ham iqtisodiyotimizda energiya sarfi boshqa davlatlardan 2 barobar yuqori ekani xususida toʻxtalib, energiya resurslaridan samarali foydalanish masalasini koʻtararkan, buning qanchalik muhimligini izohlab bergandi.

Murojaatnomada kelgusi yilda yana 4,5 ming megavattli 11 ta yirik loyihani yakuniga yetkazilib, Buxoro, Jizzax, Qashqadaryo, Navoiy, Samarqand, Fargʻona va Toshkent viloyatlarida barpo etiladigan quyosh va shamol elektr stansiyalari hisobidan qoʻshimcha 14 milliard kilovatt elektr ishlab chiqarilishi belgilangan edi.

Yurtboshimizning vodiyga tashrifi chogʻida Murojaatnomada belgilangan energiya resurslaridan samarali foydalanish masalasi borasidagi vazifalarni roʻyobga chiqayotganining guvohi boʻldik.

Bir soʻz bilan aytganda vodiyga uyushtirilgan bu safargi tashrif mamlakat iqtisodiyotida energiyani tejovchi texnologiyalarni keng joriy qilish, qayta tiklanadigan energiya manbalariga oʻtish – tezkor rivojlanish va iqtisodiy raqobatdoshlikni oshirishning zaruriy sharti va muhim omili deb biluvchi partiyamizning saylovoldi dasturidagi gʻoya va maqsadlarini roʻyobga chiqarishda katta ahamiyat kasb etdi.

Biz ham Prezidentning vodiy viloyatlaridagi koʻtarilgan masalalar va ularning yechimlari borasidagi topshiriq va koʻrsatmalaridan kelib chiqqan holda oʻz oldimizda turgan vazifalarni belgilab oldik.

Istiqbolda viloyatimizdagi partiya tashkilotlarimiz bilan davlat rahbarining vodiydagi tashrifi chogʻida belgilab berilgan vazifalar ijrosini taʼminlashda aholi orasida energiya resurslarini tejash, muqobil energetikadan samarali foydalanish, kambagʻallikni qisqartish, aholining ish bilan bandligini oshirish yoʻnalishidagi ishlarimizning samaradorligi va natijadorligini oshiramiz.

Farmon Allayev,
“Adolat” SDP Toshkent viloyati Kengashi
raisi v.v.b