Qadring baland boʻlsin ona tilim!

Til – davlat timsoli, millat koʻzgusi, maʼnaviyat sarchashmasidir. Jamiki ezgu fazilatlar inson qalbiga, avvalo, ona allasi, ona tilining betakror jozibasi bilan singadi. Ona tili – bu millatning ruhi, madaniy va maʼnaviy boyligi, xalqning madaniyati, urf-odati, uning turmush tarzi, tarixidir.

Barchamizga maʼlumki 1989-yilning 21-oktyabr kuni Vatanimizda davlat tilining huquqiy asoslarini belgilash boʻyicha “Davlat tili toʻgʻrisida”gi qonun qabul qilinib, unga koʻra Oʻzbek tiliga — Davlat tili maqomi berilgan. Xalqimizning muqaddas qadriyatlaridan biri boʻlgan ona tilimiz oʻzining qonuniy maqomi va himoyasiga ega boʻlgan. Oʻzbek tili bayrami kunini belgilash toʻgʻrisida”gi qonunga koʻra, 21-oktyabr Oʻzbek tili bayrami kuni yetib belgilangan.

Bugungi kunda oʻzbek tili bir necha rivojlangan davlatlarning 60 ga yaqin oliy oʻquv yurtlarida va 100 dan ziyod maktablarida oʻrganib kelinayotganligi haqida maʼlumotlar bor. Albatta, har qanday xalqning, millatning borligi, borligʻi va boyligiga mezon aslida, uning tiliga boʻlgan munosabatida koʻrinadi. Shuning uchun ham hali Respublikamiz mustaqilligi eʼlon qilinmasdan oldinroq, oʻzbek tiliga Davlat tili maqomi berish borasida dadil qadam tashlangan. Bu esa oqilona va odilona harakatning samarasi boʻldi.

Ona tilimiz hisoblanmish oʻzbek tilini maqtab, uni madh etib, hattoki shu mavzuda qasidalar yozib, qalam tebratgan shoir-u shoiralarimiz nihoyatda bisyor. Masalan, qalami oʻtkir shoir Rauf Parfining:

Hayhot, toptaganda arab-u moʻgʻul,

                                                                                Hayotingning zanjirli yili.

Boshdan ne kechirding mardona oʻgʻil.

Oʻzbek tili– deya aytilgan yuqoridagi sheʼrida yurtimizni koʻchmanchilar istilo qilganda ham, garchi bosib olib, oʻz tili, mafkurasini oʻrnatishga harakat qilgan boʻlsalar-da, oʻzbek millati oʻzining yeng qimmatli boyligi, yaʼni ona tilini yoʻqotmaganligi aks yetgan. Yoki shu voqealarning davomi sifatida Xurshid Davronning quyidagi sheʼrini keltirishimiz mumkin:

Kelib ketdi necha dunyolar,

Kuldi hayot, yigʻladi oʻlim.

Sen deb qurbon boʻldi bobolar,

Ular ketdi, sen qolding, tilim.

Aziz vatandoshlar, barchangizga “Oʻzbek tili bayrami” qutlugʻ boʻlsin!

Shexroz Norov,

Oʻzbekiston “Adolat” SDP Kogon tuman Kengashi raisi,

Oliy Majlis Senati huzuridagi Yoshlar Parlamenti aʼzosi,

Xalq deputatlari Kogon tuman Kengashi deputati.