Qatagʻon qurbonlari xotirasiga ehtirom koʻrsatildi

Maʼlumki,   “Adolat” sotsial-demokratik partiyasi Xorazm viloyat hamda Urganch shahar Kengashlari hamkorligida partiyaning   “Eʼzoz va eʼtibor” loyihasi doirasida Urganch davlat universiteti tuzilmasidagi “Qatagʻon qurbonlari xotirasi” muzeyida “Inson aziz – xotira muqaddas” mavzusida maʼnaviy-maʼrifiy tadbir tashkil etildi. Tadbirga partiya faollari, deputatlari hamda UrDU talabalari ishtirok etishdi.

Tadbirdan koʻzlangan maqsad yosh avlodni mustaqillik va adolat tantanasi uchun kurashgan fidoyi ota-bobolarimizning xotirasiga hurmat ruhida tarbiyalash, ularning koʻrsatgan jasorati va ibratli faoliyatini kelajak avlod ongiga singdirishdan iborat boʻldi.

Tadbirni mazkur muzey direktori, partiya faoli Yulduz Rahmanova kirish soʻzi bilan ochib berdi.

Taʼkidlanishicha, Oʻzbekiston Respublikasi Prezidentining 2020-yil 8-oktyabrdagi “Qatagʻon qurbonlarining merosini yanada chuqur oʻrganish va ular xotirasini abadiylashtirishga doir qoʻshimcha chora-tadbirlar toʻgʻrisida”gi PF-5598-sonli qarorida belgilangan vazifalarni ijrosini taʼminlash maqsadida qator amaliy ishlar amalga oshirilayotgani xususida, muzeyni tashkil etish jarayonidagi mashaqqatli ammo sharafli izlanishlar olib borilgan va aholi qoʻlidan maʼlumotlar va hujjatlar topilib, muzey fondiga topshirilgan. Qatagʻon qurboni boʻlgan xorazmliklarning avlodlari va yaqinlari, oʻsha davr voqealarini chuqur biladigan kishilarning xotiralarini yozib olish, oilaviy arxiv va kutubxonalarda saqlanayotgan tarixiy materiallar, noyob suratlarni toʻplash ishlari amalga oshirilgan.

Shuningdek, Muzeyga xorijlik mehmonlar xususan, Chexiya, Rossiya, Ozarbayjon, Turkiyadan tashriflar ham amalga oshirilayotgani, Ularga muzey haqida keng maʼlumotlar berib kelinayotgani, muzeyning istiqbollari, Xorazm tarixi va madaniyatining turizm rivojidagi tutgan oʻrni haqidagi fikrlar atroflicha almashinib kelinayotgani toʻgʻrisidagi maʼlumotlarga ishtirokchilarning diqqati qaratildi.

Shundan soʻng, ishtirokchilar muzeydan salmoqli oʻrin olgan qatagʻon qurbonlari toʻgʻrisidagi maʼlumotlar, ularning noyob fotosuratlari, eksponatlar va boshqa materiallar namoyish etildi va Yulduz Rahmanova tomonidan tushuntirilgan birma-bir qatagʻon jabrdiydalari toʻgʻrisidagi tarixiy maʼlumotlar ishtirokchilar diqqat markazidan joy oldi.

Tadbir yakunida partiyaga aʼzo boʻlish istagini bildirgan ishtirokchilarga partiyaning aʼzolik biletlari tantanali topshirildi hamda yangi boshlangʻich partiya tashkiloti tashkil etildi.

Hamkorlikni mustahkamlash maqsadida “Qatagʻon qurbonlari xotirasi” muzeyi bilan “Adolat” SDP Xorazm viloyat Kengashi oʻrtasida Memorandum tuzish rejalashtirildi.

Vohamizda oʻquv muassasalar, keng omma orasida xalqimiz kelajagi uchun jabrlangan buyuk ajdodlarimiz xotirasiga ehtirom koʻrsatishga qaratilgan hamkorlikdagi tadbirlar davom etadi.

                                                                                            Zamira Abdullaeva,

   “Adolat” SDP Xorazm viloyat Kengashi matbuot kotibi.