Qonun loyihas bilan Konstitutsiyaviy sudning vakolatlari kengaymoqda

2023 yil 24 iyul kuni Oliy Majlis Qonunchilik palatasidagi “Adolat” SDP fraksiyasining navbatdagi yig‘ilishi bo‘lib o‘tdi. Unda fraksiya a’zolari tomonidan “O‘zbekiston Respublikasining Konstitutsiyaviy sudi to‘g‘risida”gi O‘zbekiston Respublikasi Konstitutsiyaviy Qonuniga o‘zgartirish va qo‘shimchalar kiritish haqida”gi qonun loyihasi ko‘rib chiqildi.

Yig‘ilishda qayd etilganidek, yangi tahrirdagi O‘zbekiston Respublikasi Konstitutsiyasida O‘zbekiston Respublikasining Konstitutsiyaviy sudi hamda uning vakolatlariga doir yangi normalarning belgilanganligi O‘zbekiston Respublikasining Konstitutsiyaviy sudi faoliyatini yagona yondashuv asosida isloh qilish zarurligini taqozo etmoqda.

Mazkur qonun loyihasi bilan “O‘zbekiston Respublikasining Konstitutsiyaviy sudi to‘g‘risida”gi O‘zbekiston Respublikasi Konstitutsiyaviy Qonuniga O‘zbekiston Respublikasi Konstitutsiyaviy sudi tomonidan O‘zbekiston Respublikasi referendumiga chiqarilayotgan masalalarning O‘zbekiston Respublikasi Konstitutsiyasiga muvofiqligi to‘g‘risida xulosa berilishini, shuningdek O‘zbekiston Respublikasi Konstitutsiyaviy sudining sudyalari qayta saylanish huquqisiz o‘n yillik muddatga saylanishini nazarda tutuvchi o‘zgartirish va qo‘shimchalar kiritilmoqda.

Qonun loyihasi O‘zbekiston Respublikasining Konstitutsiyasi oliy yuridik kuchga egaligidan kelib chiqib, Konstitutsiya va qonunlarning so‘zsiz ustuvorligi hamda ularning bir xilda amalda bo‘lishini ta’minlaydi.

Fraksiya a’zolari partiya saylovoldi dasturidagi maqsad va g‘oyalardan kelib chiqqan holda mazkur qonun loyihasi muhim konseptual hujjat ekanligi, ushbu yo‘nalishdagi qonunchilikning uzviyligi va davomiyligini ta’minlashda alohida ahamiyat kasb etishini e’tirof etib, uni qo‘llab-quvvatladilar.

Yig‘ilishda kun tartibidagi boshqa masalalar ham deputatlar tomonidan atroflicha ko‘rib chiqilib, tegishli qaror qabul qilindi.