Qoraqalpogʻistonlik yurtdoshlarimiz uchun alohida eʼtibor qaratilgan

Joriy yilning 12-aprel kuni Qoraqalpogʻiston Respublikasi qon quyish markazida Oʻzbekiston “Adolat” SDP Qoraqalpogʻiston Respublikasi Kengashi va partiya Nukus shahar Kengashi ishtirokida “Yangilanayotgan Konstitutsiya – inson qadri uchun” mavzusida targʻibot tadbir oʻtkazildi.

Tadbirda partiya Qoraqalpogʻiston Respublikasi Kengashi raisi Nurlibay Qaipbergenov, partiya hududiy Kengashi raisi oʻrinbosari Rauaj Otarbaev, Xalq deputatlari Nukus shahar Kengashi deputati, tarix fanlari doktori Yaxshibeka Abdullayeva, tibbiyot muassasasi xodimlari va ommaviy axborot vositalari vakillari ishtirok etishdi.

Tadbirni partiya Qoraqalpogʻiston Respublikasi Kengashi raisi Nurlibay Qaipbergenov ochib berdi va boshqarib bordi.

Dastlab soʻzga Xalq deputatlari Nukus shahar Kengashi deputati, tarix fanlari doktori Yaxshibeka Abdullayeva chiqib, yangilanayotgan Oʻzbekiston Respublikasi Konstitutsiyasining 48-moddasida keltirilgan sogʻligʻini saqlash, malakali tibbiy xizmat koʻrsatish, tibbiy sugʻurta va aholining sanitariya-epidemiologik osoyishtaligini taʼminlash hamda sogʻlom turmush tarzini shakllantirishga qaratilgan muhim vazifalar bilan soha vakillarini yaqindan tanishtirdi.

Shundan soʻng partiya Qoraqalpogʻiston Respublikasi Kengashi raisi oʻrinbosari Rauaj Otarbaev soʻzga chiqib, Qoraqalpogʻistonlik yurtdoshlarimiz uchun yangilanayotgan Konstitutsiyamizda Orolboʻyi mintaqasining ekologik tizimini muhofaza qilish hamda tiklash masallariga alohida eʼtibor qaratilganligini misollar bilan taʼkidladi.

Yana bir muhim jihatlardan biri partiyamizning dasturiy vazifalarida belgilangan advokatura faoliyati yangilanayotgan Konstitutsiyamizning 141-moddasi va 142-moddalarida oʻz koʻrinishini topdi. Bunda jismoniy va yuridik shaxslarga malakali yuridik yordam koʻrsatish va advokatura faoliyatni takomillashtirish yuzasidan kuchli ijtimoiy himoyaga asoslangan muhim islohotlar amalga oshirilgan.

Shuningdek, tadbir davomida maʼruzachilar tomonidan yangilanayotgan Konstitutsiyamizda mamlakatimizning kelajagi boʻlmish yoshlarga va xotin-qizlarga boʻlgan eʼtibor hamda shart-sharoitlar yuzasidan maʼlumotlar berilib, ishtirokchilarning fikr va mulohazalarga tinglandi.

Oʻzbekiston “Adolat” SDP
Qoraqalpogʻiston Respublikasi
Kengashi matbuot xizmati