Referendumda oʻz ovozimizni beramiz

Yangilanayotgan Konstitutsiyamiz bugun jamoatchilik eʼtiborida . Unga kiritilayotgan oʻzgartishlarni yurtdoshlarimiz qoʻllab-quvvatlamoqda. Bu 30-aprelʼ kuni respublikamizda oʻtkaziladigan referendum oldidan joylarda oʻtkazilayotgan tadbirlarda oʻz ifodasini topmoqda.

“Adolat” SDP Andijon viloyat kengashi tashabbusi bilan Andijon davlat tibbiyot institutida tashkil etilgan “Konstitutsiyaviy huquqlarimdan foydalanib referendumda ovoz beraman” mavzusida tashkil etilgan tadbir ham ayni shu maqsadga qaratildi. Unda partiya faollari bilan birga “Yosh adolatchilar” va talabalar ishtirok etdi.

Tadbirda soʻz olgan Oliy Majlis Qonunchilik palatasi deputati Mavluda Adhamjonova ishtirokchilarga Bosh qonunimizga kiritilayotgan oʻzgartishlar yuzasidan tushuncha berdi. Taʼkidlanganidek, yangilanayotgan Konstitutsiyada “inson-jamiyat-davlat” tamoyili asosida inson huquqlari borasidagi normalar qariyb 3 baravarga koʻpaymoqda. Xususan, inson huquqlariga oid qator yangiliklar kiritildi. Unga koʻra insonning huquq va erkinliklari har kimga tugʻilganidan boshlab tegishli boʻladi, insonning shaʼni va qadr-qimmati daxlsizdir, insonning huquq va erkinliklari bevosita amal qiladi hamda qonunlarning, davlat organlari va ularning mansabdor shaxslari faoliyatining mohiyati va mazmunini belgilaydi.

Oʻz oʻrnida taʼlim, tibbiyot va yoshlar masalasida kiritilayotgan oʻzgartishlarga ham toʻxtalindi. Bu imkoniyatlar kelajagimiz uchun xizmat qilishligi koʻrsatib oʻtildi.

Tadbir yakunida ishtirokchilar referendumda Konstitutsiyaviy qonun loyihasini qoʻllab-quvvatlab ovoz berishligini bildirdilar.

“Adolat” SDP Andijon viloyat kengashi
Matbuot xizmati.