Salomatlik bilan referendumda qatnashamiz

Ayni vaqtda kun mavzusiga aylangan Konstitutsiyaviy islohotlar keng qamrovli boʻlib, ulardan eng eʼtiborlisi sifatli va malakali tibbiy xizmatni tashkil etish masalasini konstitutsiyaviy darajada mustahkamlab qoʻyilayotgani. Har bir fuqaroning malakali tibbiy xizmatdan foydalanishi uning ertangi kunga boʻlgan ishonchini yanada oshiradi. Shunga koʻra, Konstitutsiyamizda mamlakatda inson huquqlari va qonuniy manfaatlarini taʼminlash, qadr-qimmatini ulugʻlashda sogʻliqni saqlash tizimi ustuvor ahamiyat kasb etishi qayd etilmoqda.

Yangi tahrirdagi Konstitutsiyaning 48-moddasida qayd etilganidek, “Oʻzbekiston Respublikasi fuqarolari tibbiy yordamning kafolatlangan hajmini qonunda belgilangan tartibda davlat hisobidan olishga haqli”. Bu aholi salomatligi uchun muhim ijtimoiy koʻmak hisoblanadi.

Yuqoridagilardan kelib chiqib, 30-aprelʼ kuni oʻtkaziladigan referendum oldidan andijonlik tibbiyotchi-“adolatchilar” aholini sogʻlomlashtirish ishlarini yanada kuchaytirdilar. Shu maqsadda joylarda tashkil etilgan chuqurlashtirilgan tibbiy koʻrik tadbirlari fuqarolarni siyosiy tadbirda sogʻlom holda qatnashishlariga imkon beradi.

Andijon davlat tibbiyot institutidagi “Adolat” SDP faollari tomonidan oʻtkazilgan ana shunday tadbir salomatlik bayramiga aylandi. 400 nafardan ortiq Andijon shahri va viloyatdagi tumanlarda yashovchilarga shu kuni tibbiy maslahatlar berildi, sogʻlomlashtirishga yoʻnaltirildi. Bosh qonunimiz asosida inson salomatligiga boʻlgan bunday eʼtibordan aholi mamnun.

“Adolat” SDP Andijon viloyat kengashi
Matbuot xizmati.