Saylov jarayonida yoshlar ishtiroki muhim

O‘zbekiston “Adolat” SDP Surxondaryo viloyat “Yosh adolatchilar qanoti” Kengashi tomonidan Termiz shahar Yoshlar markazida Termiz davlat universiteti talabalari ishtirokida yoshlarning siyosiy faolligini oshirish yuzasidan davra suhbati tashkil etildi. Tadbirda partiya “Yosh adolatchilar qanoti” Kengashi vakillari, deputatlar, Yoshlar ishlari agentligi xodimlari, universitet yoshlari va keng jamoatchilik qatnashdilar.

Tadbirda so‘zga chiqqanlar mamlakatimiz aholisining aksariyat qismini yoshlar tashkil etishi, shu bois ularning ijtimoiy-siyosiy faolligini oshirish, bu yil mamlakatimizda o‘tkaziladigan muhim siyosiy jarayon-Prezidentlik saylovida yoshlarning faol ishtirokini ta’minlash muhim ahamiyat kasb etishi,bu kabi davra suhbatlari ularning mazkur jarayonga nisbatan mas’uliyatini oshirishga xizmat qilishini ta’kidladi.

Isroil Qurbonov, partiya faoli:

-  Mamlakatimizda yoshlar, ularga qaratilayotgan e’tibor va g‘amxo‘rlikka javoban mamlakatimizdagi ijtimoiy-siyosiy jarayonlarga daxldorlik hissi bilan yurt taraqqiyotiga munosib hissa qo‘shishga intilishi, xususan, bu yilgi muhim siyosiy jarayon-Prezidentlik saylovida har bir yoshning faol ishtiroki muhim ahamiyatga ega. Mamlakatimiz yoshlarining davlat va huquq haqidagi muhim bilimlarini egallab olishi, amaldagi normativ-huquqiy hujjatlar haqidagi tushunchalarini talqin qila olishi hamda ulardan to‘g‘ri foydalana olishlari muhim omil hisoblanadi. Siyosiy jarayonlarda yoshlarning huquqiy axborot bilan ta’minlash, huquqiy targ‘ibotning innovatsion usullaridan keng foydalanish, shu jumladan, veb-texnologiyalarni qo‘llash tizimi kengaytirilganligi ham ahamiyatlidir.

Saylovga tayyorgarlik ko‘rish va uni o‘tkazish bo‘yicha amalga oshiriladigan tadbirlarda yoshlarning ijtimoiy-siyosiy faolligini yanada oshirish bo‘yicha targ‘ibot ishlarining izchil olib borilishi, ularning o‘z ovozi davlatimiz va jamiyatimizning kelgusi taraqqiyoti uchun g‘oyat muhim ahamiyatga ega ekanliklarini anglab yetishlariga xizmat qiladi.

Tadbir davomida yoshlar partiya safiga qabul qilinib, a’zolik bileti topshirildi. Tadbir yakunida qatnashchilari o‘zlarini qiziqtirgan savollariga tegishlicha javoblar olishdi.

Davlatbek Abduqahhorov,

 “Adolat” SDP Termiz shahar “Yosh adolatchilar qanoti” Kengashi raisi.