Sayyor qabullar — muammolarni hal qilishning samarali uslubi

Korxona ishchi-xodimlarining mehnat qilish jarayonlarida muayyan masalalar bilan yuqori organlarga murojaat qilish ehtiyoji tugʻiladi. Sayyor qabullar esa odamlarning mana shu istagini qondirayotgani barobarida ovoragarchiliklarning oldini olish, muammolarni imkon qadar oʻz oʻrnida va tezkor hal etishda muhim ahamiyat kasb etadi.

Shu maqsadda, “Issiqlik elektr stansiyalari” AJ maʼmuriyati mahalliy kengashlar deputatlari bilan hamkorlikda tizim korxonalarida sayyor qabullar oʻtkazib borilmoqda va ishchi-xodimlarning murojaatlari tinglanmoqda. Kuni kecha Qibray tumanida joylashgan “Toshkent IES”da xalq deputatlari Toshkent viloyat kengashi deputati Gulnora Ahmedova bilan hamkorlikda ana shunday sayyor qabul tashkil etildi.

Yoqilgʻi-transport sexi ishchisi Dilfuza Muzaffarova korxonada xotin-qizlar masalasiga, ularga mehnat qilishlari va dam olishlari uchun yetarli sharoitlar yaratilayotganligi barobarida ayollarning ish tajribasi va malakasini hisobga olgan holda oylik maoshlari va koeffitsiyentlarini koʻtarib borish taklifini bildirdi.

Issiqlik nazorati va avtomatika sexi injeneri Bobur Anvarov keyingi paytda ishchi-xodimlar uchun yaratilayotgan zamonaviy sharoitlar va xodimlarning malakasini oshirib borish uchun qilinayotgan saʼy-harakatlar uchun oʻz minnatdorligini yetkazdi.

Sayyor qabul davomida oʻndan ziyod murojaatlar kelib tushdi. Ularning orasida mazkur masalalar – ishchilarning maxsus kiyimlari tabiiy matodan va qulay boʻlishi, ish vaqtidan tashqari dam olish sharoitlarini yanada yaxshilash, sogʻliklarini tiklashda ijtimoiy va moddiy yordam berish singari taklif-murojaatlarga alohida eʼtibor qaratildi.

Taʼkidlash zarurki, sayyor va ommaviy qabullar tashkil etish orqali barcha turdagi rahbarlar ishchi-xodimlar bilan yanada yaqinlashib, mavjud masala va muammolarning aniq tahlili vujudga kelishida yordam beradi.

Oʻzbekiston “Adolat” SDP Toshkent viloyati Kengashi
matbuot xizmati.