Senator boshchiligida Ichki ishlar vazirligi axboroti yuzasidan Toshkent viloyatida o‘rganishlar olib borilmoqda

“O‘zbekiston Respublikasi Oliy Majlisi Senatining Reglamenti to‘g‘risida”gi O‘zbekiston Respublikasi Qonunida Senatning yalpi majlislarida ichki ishlar vazirining huquqbuzarliklarning oldini olish va ularning profilaktikasi holati to‘g‘risidagi axborotini eshitish belgilangan.

Unga muvofiq navbatdagi yalpi majlisda 2022-yil yakuni bo‘yicha ichki ishlar vazirining huquqbuzarliklarning oldini olish va ularning profilaktikasi holati to‘g‘risidagi axborotini eshitish rejalashtirilmoqda.

O‘z navbatida, vazirlik tomonidan Senatga kiritilgan axborotda qayd etilgan holatlar, xususan, huquqbuzarliklarning oldini olish va ularning profilaktikasi holati yuzasidan hududlarda amalga oshirilayotgan ishlar, sohada uchrayotgan, shuningdek, fuqarolarni o‘ylantirayotgan muammolar bilan yaqindan tanishish maqsadida Senatning Mudofaa va xavfsizlik masalalari qo‘mitasi raisi Q.Burxanov va rais o‘rinbosari T.Madumarov, xalq deputatlari Toshkent viloyati Kengashi kotibiyati, viloyat IIBB, prokuratura va boshqa mutasaddi vazirlik va idoralar vakillari ishtirokida Toshkent viloyatida o‘rganishlar olib borilmoqda.

O‘rganishlar doirasida hududda tezkor-qidiruv faoliyati, jinoyatchilarni ushlash, bedarak yo‘qolgan shaxslarni topish, sodir etilgan va fosh etilmay qolgan og‘ir va o‘ta og‘ir turdagi jinoyatlar, uyushmagan yoshlar, xotin-qizlar, voyaga yetmaganlar tomonidan sodir etilgan qonunbuzarliklar ro‘y berishiga shart-sharoit yaratgan omillar, profilaktik ishlar samaradorligi yuzasidan amalga oshirilayotgan ishlar atroflicha tahlil qilinmoqda. Mavjud muammolarni bartaraf etish yuzasidan tegishli tavsiya va takliflar berilmoqda.

Senatorlarning Toshkent viloyatidagi o‘rganishlari davom etmoqda.