“Senator va yoshlar” uchrashuvi boʻlib oʻtdi

Toshkent viloyati Oqqoʻrgʻon tumanidagi Yoshlar ishlari agentligi Oqqoʻrgʻon tumani boʻlimida “Senator va yoshlar” mavzusida uchrashuv tashkil etildi. Uchrashuvda Senatning Mudofaa va xavfsizlik masalalari qoʻmitasi raisi Qutbiddin Burxonov, Oʻzbekiston “Adolat” SDP Toshkent viloyati Kengashi mutasaddilari, Xalq deputatlari hududiy va mahalliy Kengashlaridagi partiya deputatlari, yoshlar hamda OAV vakillari ishtirok etishdi.

Ochiq muloqot ruhidan oʻtgan tadbirda yurtimizda olib borilayotgan keng koʻlamli islohotlarning katta qismi yoshlarga qaratilayotgani xususida soʻz bordi. Bugungi kunda yoshlarning huquqiy, siyosiy savodxonligini oshirish, mamlakatimizda olib borilayotgan islohotlar mohiyatini targʻib qilish, yangi qabul qilinayotgan qonunlar bilan tanishtirish, eng muhimi, bu borada yoshlarning faolligi hamda bilimini oshirish borasida qiziqarli maʼruzalar qilindi.

Qizgʻin kechgan uchrashuvda senator va deputatlar yoshlarning mamlakatimizning barqaror taraqqiyotida muhim boʻlgan tashabbus va taklif larini tinglasharkan, ularni qiynab turgan muammolar haqida ham soʻrashdi.

Munozarada boy tarzda oʻtgan tadbirdan soʻng Yoshlar ishlari agentligi Oqqoʻrgʻon tumani boʻlimi hududida senator va deputatlar hamda yoshlar ayni kunlarda butun mamlakatimiz boʻylab xalqimiz yakdilligida bahamjihat oʻtkazilayotgan “Yashil makon” umummilliy loyihasi doirasidagi ezgu ishlarga oʻz hissasini qoʻshish maqsadida koʻchat ekish ishlarini ham tashkil etishdi.

Yangi nihollarni oʻtqazisharkan, “Ekilgani emas, koʻkargani hisob” naqliga amal qilishdi.

“Adolat” SDP Toshkent viloyati Kengashi Matbuot xizmati.