Sifatli taʼlim –Yangi Oʻzbekiston uchun eng toʻgʻri yoʻl

“Adolat” SDP Qamashi tuman Kengashi tomonidan Chim MFY tadbirgohida “Taʼlim sifatini oshirish-Yangi Oʻzbekiston taraqqiyotining yagona yoʻli” mavzusida davra suhbati tashkil etildi. Unda partiya faollari, pedagoglar, yoshlar, ota-onalar qatnashdi.

Tadbirda xalq deputatlari Qashqadaryo viloyat Kengashi deputati Abduqahhor Ahmedov maʼruza qildi.

Mamlakatimizda Prezidentimiz boshchiligida taʼlimga juda katta eʼtibor berilyapti,-dedi Abduqahhor Ahmedov.- Shu tufayli ham Oʻzbekiston taʼlim tizimida islohotlar izchil davom etayotgani va faollashayotganini alohida mamnuniyat bilan taʼkidlashni istardim. Zotan, xalqimiz mamlakatimizda amalga oshirilayotgan olamshumul oʻzgarishlar natijasini koʻrib turibdi. Birgina shu yilning oʻzida bizning viloyatimizda ham bir nechta yangi ilm maskanlari qad rostladi. 350 dan ziyod taʼlim muassasalari esa zamonaviylik asosida taʼmirlanib yangi oʻquv qurollari bilan jihozlandi. Albatta, kelgusi yillarda ham viloyatimiz shahar, qishloqlarida yangi maktablar qurish, taʼlim tizimida islohotlarini davom ettirish, oʻqituvchi va murabbiylar mavqe hamda nufuzini oshirish boʻyicha ham katta rejalar qilinayotgani barcha taʼlim sohasi xodimlarini behad quvontirdi. Ayniqsa, sohada faoliyat olib borayotgan oʻqituvchilar obroʻsini yuksaltirishni mamlakatimizning asosiy qonuni – Yangi konstitutsiyamizga muhrlab qoʻyilishi davlatimizda taʼlim sohasiga yuksak eʼtibor qaratilayotganligi ifodasidir.

Men koʻp yillardan buyon taʼlimda xususan, oliy taʼlimda faoliyat olib boraman,- dedi partiya faoli Nasiba Azizova.- davlatimiz tomonidan taʼlimdagi korrupsiyaga barham berishga alohida eʼtibor berilyapti. Shu tufayli ham Oliy taʼlim tizimida ham taʼlim sifati oshib korrupsiyaning har qanday koʻrinishlariga barham berilyapti. Oliygohlar oʻrtasida haqiqiy raqobat muhiti shakllanmoqda.

Davlatimiz rahbari alohida eʼtirof etganlaridek, mamlakatimizda oliy taʼlimga oʻqishga kirishdagi korrupsiya deyarli yoʻq boʻldi. Biroq oliy taʼlim muassasalari ichidagi korrupsiya koʻrinishlari hamon saqlanib qolmoqda. Ayni kunlarda taʼlim tizimini, ayniqsa, oliy taʼlimni korrupsiya illatidan butkul xalos etish uchun keng qamrovli ishlar olib borilyapti. Albatta, bunga faqat targʻibot uchrashuvlarini koʻpaytirish, ijtimoiy soʻrovlar oʻtkazish bilan erishib boʻlmaydi. Yangi Oʻzbekistonda korrupsiyani yoʻqotsak, taʼlim sifati oʻz-oʻzidan oshadi. Yoshlarimizga zamonaviy sifatli taʼlim beriladi. Tadbirda shular xususida ham fikr mulohaza yuritildi. “Adolat” SDP tashkilotlari tomonidan ham joylarda taʼlim sifatini oshirish, korrupsiyaning har qanday koʻrinishlariga chek qoʻyish, oʻqituvchilarning obroʻsini yuksaltirish, taʼlimga koʻproq investitsiyani kiritish borasida ham amaliy ishlar olib borilayotgani qayd etildi.

Nurmahmad Mirzayev,

“Adolat” SDP Qamashi tuman Kengashi raisi.