Sifatsiz dori-darmonlar tanqid qilindi

“Adolat” SDP Uchtepa tuman Kengashi tomonidan partiya Uchtepa tuman tashkiloti raisi X.Xonkeldiyev tashkilotchiligida “Dori vositalarining noqonuniy almashinishi, oldini olish, narxlarining barqarorligini taʼminlash va ularni shifokor retseptisiz sotilishiga barham berish” mavzusida tadbir oʻtkazildi.

22-oilaviy poliklinikada oʻtkazilgan tadbirda deputatlar, partiya faollari, sohaga doir mutaxassis shifokorlar ishtirok etishdi.

Barchamizga maʼlumki, yaqindan boshlab yurtimizda sotilayotgan dori vositalaridan ayrim insonlar, asosan goʻdaklar zaharlangani, hatto vafot etgani haqida noxush xabarlar tarqala boshladi. Bu xabarlar oʻz tasdigʻini topdi ham. Bundan bir necha yil oldin “Adolat” SDPning oʻz saylovoldi dasturida “Sifatsiz va qalbaki dori vositalariga qarshimiz” shiori mamlakatimiz boʻylab ilgari surilgan edi. Afsuski, bu boradagi ishlarga joylarda mutasaddilar tomonidan yetarlicha eʼtibor qaratilmadi. Natijada bolalarning dorilardan zaharlanish holatlari yuz berdi.

Bundan soʻng ushbu jihatga jiddiy eʼtibor beriladimi? Yurtimizda turli dori vositalarining noqonuniy aylanmasiga chek qoʻyiladimi? Tadbirda shu kabi savollar oʻrtaga tashlanib, keng muhokamadan oʻtkazildi. Shuningdek, shifokorlar bemorlarga retsept yozayotganida masalaga har tomonlama chuqur yondashishi lozimligi aytilib, ogohlikka chaqirildi. Hozirgi kunda qaysi dori vositalarining narx-navosi beqarorlashgani va bu xususda qanday choralar koʻrilishi kerakligiga ham toʻxtalib oʻtildi

Bildirilgan takliflar, fikr-mulohazalar partiya deputatlari tomonidan mahalliy kengash sessiyalarida masala sifatida koʻtarilishi uchun alohida qayd qilib olindi.

Mehriniso Yoqubova,

“Adolat” SDP Toshkent shahar Kengashi matbuot kotibi