Siyosiy jarayonda faol qatnashganlar taqdirlandi

Jamiyat va davlat uchun muhim hujjatlarning biri, yaʼni Oʻzbekiston Respublikasi Prezidentining “Oʻzbekiston – 2030” strategiyasi toʻgʻrisida”gi Farmoni qabul qilindi. Ushbu Strategiyada mamlakatimizda kelgusi yetti yillikda amalga oshirilishi lozim boʻlgan maqsadlarning aniq, rejali va konseptual dasturi bayon etilgan.

Bundan tashqari, “Oʻzbekiston – 2030” strategiyasi doirasida Yangi Oʻzbekiston taraqqiyot strategiyasida belgilangan va amalga oshirilishi davom etayotgan, oʻz ahamiyatini yoʻqotmagan barcha maqsadlarga erishilishi va dolzarb vazifalar bajarilishi belgilab qoʻyilgan.

Shu jihatlarni inobatga olgan holda, “Taraqqiyot strategiyasi” markazi tomonidan “Oʻzbekiston-2030” strategiyasini keng jamoatchilikka etkazish maqsadida tadbir tashkillashtirildi.

Mazkur tadbir “Oʻzbekiston – 2030” strategiyasi mazmun-mohiyati va ahamiyatiga bagʻishlangan videorolik namoyishi bilan boshlandi.

Shundan soʻng “Taraqqiyot strategiyasi” markazi ekspertlari tomonidan strategiyada belgilangan ustuvor vazifalar yuzasidan maʼlumotlar berib oʻtildi.

Tadbir davomida Oʻzbekiston Respublikasi Oliy Majlisi Senati aʼzosi U.Jalmenov va Qoraqalpogʻiston Respublikasi Joʻqorgʻi Kengesi qoʻmita raisi Sh.Otemisovlar “Oʻzbekiston – 2030” strategiyasining amalga oshirilishi va belgilangan vazifalarning ijrosi taʼminlanishi holatini, buning doirasida ajratilgan mablagʻlarning maqsadli va samarali ishlatilishini oʻrganish, ijro holati yuzasidan axborotni har chorakda eshitish va tanqidiy muhokama qilib borish yuzasidan oʻzlarining fikr va mulohazalarini bildirdi.

Tadbir yakunida “Oʻzbekiston – 2030” strategiyasi qabul qilinishida faol ishtirok etgan, oʻz takliflari va loyihalari bilan qatnashgan, partiyamizning Taxiatosh tumani Kengashi raisi Jolgʻasov Orazbek “Taraqqiyot strategiyasi” markazining, Qoraqalpogʻiston Respublikasi Kengashi raisining oʻrinbosari Rawaj Otarbaev Qoraqalpogʻiston Respublikasi Vazirlar Kengashining tashakkurnomasi bilan taqdirlandi.

Ushbu targʻibot tadbiridan koʻzlangan asosiy maqsad, mazkur strategiya haqida aholi xabardorligini oshirish va ushbu hujjatni keng jamoatchilikka yetkazishdan iborat.

Yana bir muhim jihati, “Oʻzbekiston – 2030” strategiyasi – xalq strategiyasi” shiori ostida belgilangan islohotlarning izchil, sifatli va oʻz vaqtida bajarilishi yuzasidan samarali jamoatchilik nazoratini oʻrnatish ham mamlakatimiz taraqqiyoti yoʻlidagi jiddiy vazifalardan biri sanaladi.