Sizga taʼzimdamiz ayollar

Bahorning ilk bayrami 8-mart- Xalqaro xotin-qizlar kuni mamlakatimizda har yili munosib nishonlanadi. Oila va jamiyat ustuni, hayotimizning fayzi va koʻrki boʻlgan xotin-qizlarni eʼzozlash, ularga hurmat va ehtirom koʻrsatish xalqimiz uchun azal-azaldan buyuk qadriyat boʻlib kelgan. Ayol bilan hayotimiz goʻzal va mazmunli, xonadonlarimiz obod va nurafshon.

“Adolat” SDP Andijon viloyat kengashi tomonidan bayram arafasida tashkil etilgan “Sizga taʼzimdamiz ayollar” deya nomlangan tadbirda yuqoridagilar щz ifodasini topdi. Partiya safidagi faol xotin-qizlar taklif etilgan mazkur tadbirda soʻz olganlar vatanimiz taraqqiyotida, oila va jamiyat hayotida xotin-qizlar muhim oʻringa ega ekani, barcha sohalarda xususan, davlat boshqaruvi va vakillik organlari, sogʻliqni saqlash, taʼlim, madaniyatda samarali mehnat qilayotganliklarini eʼtirof etdilar. Andijonlik “adolatchilar” safidagi 12 ming nafardan ortiq xotin-qizlar xaqida ijobiy fikrlar bildirildi. Ularning faolligi natijasida bugun viloyatda partiyamiz oʻz oʻrniga ega.

“Yosh adolatchilar” safidagi Zulfiyaxonimning izdoshlari, ixtirochi va ijodkor qizlardan umidimiz katta. Ular yangi Oʻzbekistonning kelajagini yaratishga munosib hissa qoʻshmoqda.

Dilfuza Ahmedova, xalq deputatlari Izboskan tuman kengashi deputati:

-Prezidentimiz boshchiligida davlatimiz tomonidan bizga boʻlgan eʼtibor va gʻamxoʻrlikning cheki yoʻq. Oʻzbekistonning har bir ayoli bugun baxtli. Bunga javoban biz oʻz oilamiz, ona Vatanimiz ravnaqi, farovonligi yoʻlida faol boʻlmogʻimiz lozim. Yurtning kelajagi tom maʼnoda xotin-qizlar qoʻlida.

Tadbir davomida onalarimizni, lobar ayollarni madh etuvchi sheʼrlar oʻqildi, kuy va qoʻshiqlar yangradi.

“Adolat” SDP Andijon viloyat kengashi

Matbuot xizmati.