Sogʻlom turmush tarzini targʻib qilish-bugunning talabi

Oʻzbekiston “Adolat” SDP Oltinsoy tuman Kengashi, partiya “Ayollar qanoti” tuman Kengashi faollari hamda viloyat Maʼnaviyat markazi, viloyat Oila va xotin-qizlar qoʻmitasi hamkorligida tumandagi mahallalarda “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi Oʻzbekiston Respublikasi Prezidentining PQ-4887-son qarori ijrosi boʻyicha yoshlar va xotin-qizlar orasida “Toʻgʻri ovqatlanish va sogʻlom turmush tarzi” mavzusida targʻibot tadbirlari oʻtkazildi.

Xususan, faollar tumandagi “Obshir”, “Chep” MFYlariga tashrif buyurdilar. Uyma uy yurish davomida mazkur mahallalar aholisini tibbiy koʻrikdan oʻtkazish va ularga sogʻlom turmush tarzini targʻib qilish uchun aholiga tibbiy yordam koʻrsatish boʻyicha oʻz koʻmaklarini berdilar.

Faollar va qishloq oilaviy poliklinikasi tibbiyot xodimlari birgalikda mahallalarda aholini tibbiy koʻrikdan oʻtkazildi. Koʻrik – yoshi ulugʻ keksalar, hamda yosh bolalarga kerakli muolajalar qilishdan boshlandi.

Aytish joiz, sogʻlom turmush tarziga rioya etish koʻplab muammolarning oldini olish demakdir. Bugun ushbu mavzuga juda koʻp duch kelyapmiz. Faollar aholiga bir qaraganda qiyin koʻrinuvchi, anchagina kuch, sabr va iroda, vaqt va sharoit talab etuvchi sogʻlom turmush tarzining asosiy qoidalari nimalardan iborat ekanligi tushuntirdilar.

Sogʻlom turmush tarzining eng muhim qoidalaridan biri sport, jismoniy mashqlardir. Sport-umrimiz oxiriga qadar sogʻlom hayot kechirishning asosiy shartlaridan. U yosh ham, joy ham, hattoki shart-sharoit ham tanlamaydi. Ana shu xususda ham mahalla aholisiga keng va atroflicha tushunchalar berildi. Aholini sogʻlom turmush tarzini targʻib qilish, ularni yanada yaxshi yashashi, ularni sport bilan muntazam shugʻullanishi zarurligi aytib oʻtildi.

Malika Xidirova, partiya Oltinsoy tuman “Ayollar qanoti ” Kengashi faoli:Oʻzbekiston “Adolat” sotsial-demokratik partiyasi Saylovoldi dasturida ham aholining barcha ijtimoiy qatlamlari sifatli tibbiy xizmatdan foydalanishini taʼminlash, maktab va maktabgacha taʼlim muassasalari doirasida tibbiy xizmatlar tizimini kuchaytirish, skrining va perinatal markazlari, ayollar tibbiy maslahatxonalari, tugʻruq majmualari, ginekologiya va patronaj xizmatlari faoliyatini takomillashtirishga doir ustuvor vazifalar belgilanganligi partiyamiz faollari va deputatlaridan katta masʼuliyat talab etadi.

Shu oʻrinda alohida taʼkidlash joizki, bugungi kunda fuqarolarning reproduktiv salomatlik borasida tibbiy savodxonligi va madaniyatini oshirish, ham jismonan, ham maʼnaviy jihatdan sogʻlom, barkamol avlodni voyaga yetkazishga eʼtiborni yanada kuchaytirish, yoshlarda sogʻlom turmush tarziga rioya qilishga intilishni shakllantirishga qaratilgan tizimli ishlarni yangi bosqichga olib chiqishni davrning oʻzi taqozo etmoqda. Shuning uchun partiya tashkilotlari va deputatlari tomonidan joylarda oʻtkazilayotgan uchrashuv va tadbirlarda bu masalaga alohida eʼtibor bergan holda mamlakatimizda tibbiyot sohasida hayotga tatbiq etilayotgan islohotlarning mazmun-mohiyati aniq misollar orqali aholiga yetkazilmoqda.

Dilafro‘z Rahmatova,

 “Adolat” SDP Surxondaryo viloyat Kengashi mafkuraviy ishlar bo‘yicha bosh mutaxassisi.