Sud tizimi mustaqil boʻlmas ekan, jamiyatimizda rivojlanish boʻlmaydi

“Adolat” SDP Shahrisabz   tuman Kengashi tomonidan “Sud mustaqilligini toʻliq taʼminlash — eng muhim vazifalarimizdan biri boʻlishi zarur” mavzusida tadbir boʻlib oʻtdi. Shahrisabz tumanlararo sudi binosida tashkil etilgan tadbirda mahalliy Kengash deputatlari, huquq tartibot idoralari vakillari, yoshlar, xotin-qizlar tashkilotlari masʼullari va keng jamoatchilik hamda ommaviy axborot vositalari xodimlari qatnashdi. Tadbirda huquqshunos Dilrabo Choriyeva soʻzga chiqib, mamlakatimizda qonun ustuvorligini taʼminlash, sudyalar mustaqilligiga erishish borasida amalga oshirilayotgan barcha ezgu ishlar siyosiy kuch maqsad va vazifalariga hamohang ekanligi bilan ahamiyatli ekanligini qayd etdi.

-Mamlakatimizda sud tizimi mustaqil boʻlmas ekan, jamiyatimizda rivojlanish boʻlmaydi,-dedi huquqshunos Abdurahmat Kengboyev.-. Sud idorasiga ishi tushgan har bir shaxs ushbu dargohda qonun va adolat ustuvor ekaniga ishonch hosil qilishi lozim, – Buning uchun Yangi Oʻzbekistonda har qanday bahsli masalaga adolatli yechim faqat odil sud tomonidan topilishi, sudyalar ishiga har qanday aralashuv keskin jazolanishi, ularning xavotirsiz ishlashi uchun barcha zarur sharoitlar yaratilishi kerak.Bu haqda yangilanayotgan Konstitutsiyamizda ham alohida modda va normalar kiritilgan.

Darhaqiqat, Oʻzbekiston Respublikasida sud hokimiyati qonun chiqaruvchi va ijro etuvchi hokimiyatlardan, siyosiy partiyalardan, boshqa jamoat birlashmalaridan mustaqil holda ish yuritishi hamda sudyalarning mustaqilligi, ular senator, davlat hokimiyati vakillik organlarining deputati boʻlishi mumkin emasligi Konstitutsiyada belgilangan.Xususan, sudyalar mustaqil boʻlib, faqat qonunga boʻysunadilar, ularning odil sudlovni amalga oshirish borasidagi faoliyatiga biron-bir tarzda aralashishga yoʻl qoʻyilmaydi va bunday aralashish qonunga muvofiq javobgarlikka sabab boʻladi. Demak, mamlakatimizda sud va sudyalar mustaqilligining huquqiy asoslari yaratilgan hamda takomillashtirilib borilmoqda.

Tadbirda shular xususida fikr mulohaza yuritildi. Mamlakatimizda sud-huquq tizimida amalga oshirib kelinayotgan izchil, tizimli va keng koʻlamdagi islohotlar barcha jabhada adolatni taʼminlashga xizmat qilishi taʼkidlandi.

  — Mamlakatni yanada rivojlantirishning ustuvor yoʻnalishlaridan biri sud tizimini izchil demokratlashtirish, sud hokimiyatining mustaqilligi toʻgʻrisidagi konstitutsiyaviy normalarga qatʼiy rioya etilishini taʼminlash hisoblanadi,-dedi xalq deputatlari Qashqadaryo viloyat Kengashi deputati Dilrabo Temirova.- Sud tizimini isloh qilishga qaratilgan keng qamrovli choralarga qaramasdan, sud faoliyatida hozirgi kunga qadar saqlanib kelayotgan muammolar ushbu sohadagi islohotlarni davom ettirish zaruratini keltirib chiqarmoqda. Bugungi kunga kelib sud hokimiyatining chinakam mustaqilligini taʼminlash, fuqarolar va tadbirkorlarning huquq va erkinliklarining ishonchli himoya qilish kafolatlarini kuchaytirish, odil sudlovga erishish darajasini oshirishni sud-huquq tizimini yanada isloh qilish sohasida davlat siyosatining asosiy ustuvor yoʻnalishlari etib belgilanganligi muhim ahamiyat kasb etmoqda. Zero har bir sudyaning chiqargan qarori inson haq huquqlarini har tomonlama himoya qilishga qaratilmogʻi lozim.

Samandar Ixtiyorov,

 “Adolat” SDP Shahrisabz tuman Kengashi raisi.