Taʼlimda korrupsiyaga yoʻl bermaymiz!

Jamiyatda shunday illatlar borki, u maʼlum bir sohaga emas, balki butun jamiyat taraqqiyotiga toʻgʻonoq boʻladi. Davlatni ich-ichidan yemiradigan ana shunday illat – korrupsiya va poraxoʻrlikdir. Aynan shu illat sababli koʻplab davlatlarning inqirozga yuz tutgani ham tarixdan maʼlum. Korrupsiya dunyo miqyosida hal etilishi lozim boʻlgan global muammolardan biridir. Ushbu illat har qanday davlat va jamiyatning siyosiy-iqtisodiy rivojlanishiga jiddiy putur yetkazib, inson huquq va erkinliklarining poymol boʻlishiga olib keladi. Shu bois unga qarshi kurash xalqaro ahamiyat kasb etib, jahon siyosatining muhim masalalari qatoridan joy olgan.

Kuni kecha “Adolat” SDP Kogon shahar Kengashi raisi Zarnigor Tosheva tomonidan shahardagi 11-maktabda “Taʼlimda korrupsiyaga yoʻl bermaymiz” mavzusida mazkur dargohning pedagoglari ishtirokida davra suhbati boʻlib oʻtdi.

Uchrashuvda shahar Kengashi raisi Z.Tosheva soʻzga chiqib, bugungi kunda korrupsiyaga qarshi kurashish borasida qabul qilingan meʼyoriy-huquqiy hujjatlar doirasida tizimli ishlar olib borilayotganligi, korrupsiyaning maʼlum bir mamlakatda rivojlanishi esa oʻsha davlatning tanazzuliga olib kelishi toʻgʻrisida toʻxtalib oʻtdi.

Darhaqiqat, korrupsiya – ildizlari davlat xizmatini tashkil etishdagi nuqsonlarga va davlat xizmatchilarining oʻziga xos psixologiyasiga borib taqaladigan ijtimoiy hodisa. Bu korrupsiyaga qarshi avvalo maʼmuriy-huquqiy va tashkiliy-boshqaruv chora-tadbirlari koʻrilishi zarurligidan darak beradi.

Tadbir yakunida ishtirokchilar oʻzlarini qiziqtirgan savollariga partiya shahar Kengashi raisi tomonidan atroflicha javoblar oldilar.

Mohigul Rahimqulova,

“Adolat” SDP Buxoro viloyat Kengashi matbuot kotibi.