Ta’limning qulashi – millatning yemirilishidir

Dunyo taraqqiyoti shiddati barcha soha kabi ta’lim-tarbiya jarayoniga ham yangicha yondashuvni, innovasion texnologiyalarni tatbiq qilishni taqozo etayapti. Darhaqiqat, so‘nggi yilllarda mamlakatimizda ta’lim sohasiga alohida e’tibor qaratildi, xususan, ta’lim-tarbiya tizimini tubdan takomillashtirish, ertangi kunimizning munosib davomchilarini kamolga yetkazishning mustahkam tashkiliy-huquqiy mexanizmi yaratish borasida keng ko‘lamli islohatlar amalga oshirildi. Sohani yana-da yuksaltirish borasida qabul qilingan qator davlat dasturlari, qonun hujjatlariga asosida ko‘plab ta’lim muassasalari yangidan qurildi, eng zamonaviy o‘quv anjomlari bilan ta’minlandi. Bu boradagi ishlar bugungi kunda yana-da jadal tus olmoqda.
Kuni kecha O‘zbekiston Respublikasi Prezidenti Shavkat Mirziyoyev raisligida maktablarda ta’lim sifatini yana-da oshirish, o‘quvchi o‘rnini ko‘paytirish hamda o‘qituvchilar malakasini oshirish va ularga munosib sharoit yaratish bo‘yicha ustuvor vazifalar yuzasidan bo‘lib o‘tgan videoselektor yig‘ilishida keng qamrovli hamda o‘ta samarali masalalar muhokama etildi. Albatta, yig‘ilishda belgilangan vazifalar katta siyosiy, ma’naviy, ma’rifiy va ijtimoiy ahamiyatga ega. Ularni to‘laqonli bajarish, amaliy natijalarni yana-da mustahkamlash yo‘lida olib boriladigan ishlar soha vakillari, o‘qituvchilar, pedagoglar bilan bir qatorda biz siyosiy kuch vakillari zimmasiga ham ulkan vazifalarni qo‘yadi.
Yig‘ilish davomida Prezident Shavkat Mirziyoyev joriy yilda 387 ming nafar maktabni bitirgan o‘quvchi yoshlarning, 138 mingtasi oliygohga, yana 54 mingtasi professional ta’lim bilan qamrab olingani qayt etilib, qolgan 190 mingdan ortiq yoshlar taqdiri haqida qayg‘urib gapirdi.
Shuningdek, Oqdaryo tumanidagi 32-maktabda tadbirkorlar bilan hamkorlikda o‘quvchilarni kasbga o‘qitish tajribasi yo‘lga qo‘yilgani, bu maktabda o‘quvchilar 7-sinfdan boshlab mahalla va tumanda talab yuqori bo‘lgan veterinar, agronom, meva-sabzavot quritish, ipakchi, mebelchi, avtomobil ustasi kabi 15 ta kasb-hunarga o‘rgatilayotgani, ularga 2 ta chet tili o‘qitilayotgani alohida ta’kidlanib, kelgusi o‘quv yilidan boshlab viloyatimizdagi har bir tumanda 10 tadan maktabda bu tizimni joriy etish, qolgan viloyatlarda ham yil yakuniga qadar har bir tumanda kamida ikkitadan maktabda ushbu tajribani yo‘lga qo‘yish topshirildi. Albatta, buning zamirida qancha izlanishlar, qancha mehnat talab qilinsada, yosh avlodning porloq kelajagi, ertangi kunidan, bugunidan rozi bo‘lib yashashi yo‘lida qo‘yilgan katta qadamdir.
Janubiy Afrikadagi Stellenbosh universitetiga kirish eshigi oldida quyidagi yozuvni o‘qishingiz mumkin: “Har qanday davlatni yo‘q qilish uchun atom bombasi yoki uzoq masofaga uchuvchi raketalardan foydalanish shart emas, faqat ta’lim sifatini pasaytirish va talabalarga imtihonlarda ko‘chirish imkonini berish kerak. Bemorlar ana shunday shifokorlar qo‘lida o‘lishadi. Binolar bunday muhandislar qo‘li bilan vayron bo‘ladi. Bunday iqtisodchi va hisobchilarning qo‘lidan pul qochadi. Bunday advokatlar va sudyalar qo‘lida adolat yo‘qoladi. Ta’limning qulashi – millatning yemirilishidir”. Ijtimoiy tarmoqlarni kuzatar ekanman yuqoridagi fikr e’tiborimni tortdi. Darhaqiqat, davlat hamda jamiyat ravnaqi yosh avlodning intellektual salohiyati, intilishi, shijoati bilan uzviy bog‘liq. Shunga ko‘ra, ta’lim-tarbiyani zamon talablari asosida takomillashtirishga, ta’lim sifatini yuksaltirishga mamlakatimiz barqaror rivojining muhim sharti sifatida yondashilayotgani ayni muddaodir. Zero, ona Vatanga sadoqatli, bilimli, chinakam komil insonlarni voyaga yetkazish bugun barchamizning ulug‘vor maqsadimizga aylanmog‘i zarur.

Muhiba Sayfiddinova,
Xalq deputatlari Samarqand shahar Kengashi deputati.