Talabalar oʻrtasida “Zakovat” intellektual oʻyini tashkil etildi

Mamlakatimizda oʻsib kelayotgan yangi avlod vakillariga har tomonlama eʼtibor va gʻamxoʻrlik koʻrsatish, ularning ezgu intilishlarini qoʻllab-quvvatlash va ragʻbatlantirish, mustaqil fikrlaydigan, zukko va keng dunyoqarashga ega boʻlgan oʻgʻil-qizlarni tarbiyalash borasidagi ishlarga davlat siyosatining eng muhim va ustuvor yoʻnalishi sifatida alohida ahamiyat berilmoqda.

Bugungi kunda intellektual oʻyinlarni tashkil etishda, Prezidentimizning 2022-yil 20-yanvardagi “Zakovat” intellektual oʻyinini aholi oʻrtasida ommaviy-maʼrifiy harakatga aylantirish va boshqa intellektual oʻyinlarni rivojlantirishga oid chora-tadbirlar toʻgʻrisida”gi qarori dasturil amal boʻlib xizmat qilyapti.

Mazkur hujjat iqtidorli yoshlarning mantiqiy bilimlarini oshirish, ularni saralash va intellektual oʻyinlarga keng jalb qilish, ushbu oʻyinlar tashkil qilinishini davlat tomonidan qoʻllab-quvvatlash va zarur shart-sharoitlar yaratish, shuningdek, aholining intellektual salohiyatini yuksaltirish maqsadida qabul qilindi.

Ushbu qarorning ijrosini taʼminlash maqsadida, “Adolat” SDP Buxoro viloyat Kengashi hamda TIQXMMI MTU Buxoro tabiiy resurslarni boshqarish instituti bilan hamkorlikda mazkur oliygoh talabalari oʻrtasida “Zakovat” intellektual oʻyini tashkil etildi. Bellashuvda talabalardan tashkil topgan 10 nafar jamoat bellashdi. Jamoa ishtirokchilariga adabiyot, mantiq, tarix, psixologiya fani yoʻnalishlarida savollar berildi. Zukkolik, tezkorlik, yuqori bilim va salohiyat talab etgan intellektual oʻyin gʻoliblik uchun murosasiz bahslarga boy kechdi. Jamoalarning hozirjavobligi, izlanuvchanligi ularning yuksak salohiyatlaridan darakdir. Biroq, har bir kurash oʻzining gʻolib va magʻlubiga ega. Qizgʻin kechgan oʻyinning yakuniy natijalariga koʻra 3-oʻrinni “Aktivist” jamoasi 2-oʻrinni “Aligarx” jamoasi va faxrli 1-oʻrinni esa “Zamon” jamoasi qoʻlga kiritdilar.

Tadbir yakunida jamoalar partiyaning viloyat Kengashi tomonidan diplom va esdalik sovgʻalari bilan taqdirlandilar.

Har bir harakat ostida bevosita qandaydir manfaat yotadi. “Zakovat” ham bilimdonlarni, bilim va tajribaga ega, mantiqiy fikrlay oladigan fuqarolarni, ayniqsa, zakiy yoshlarni qoʻllab-quvvatlash, ilmga chanqoq yoshlarni yuzaga chiqarishga xizmat qilishi shubhasiz.

Mohigul Rahimqulova,

“Adolat” SDP Buxoro viloyat Kengashi matuot kotibi.