Taraqqiyot strategiyasi-yoshlar nigohida 

Oʻzbekiston oʻz rivojlanish tarixida yangi davrga qadam qoʻydi. Bu yoʻlda “2022-2026-yillarga moʻljallangan Yangi Oʻzbekistonning Taraqqiyot strategiyasi” muhim dasturilamal vazifasini oʻtamoqda. Mazkur hujjatda belgilangan vazifalar davlatimizni yanada rivojlantirish, islohotlarni izchil amalga oshirish barobarida yangi marralarni egallashga xizmat qiladi.

“Adolat” SDP Andijon viloyat kengashi tomonidan tashkil etilgan siyosiy oʻquv ayni shu mavzuga bagʻishlandi. Unda Taraqqiyot strategiyasida ilgari surilgan gʻoyalar va jamiyat rivoji xususida soʻz bordi.

Taʼkidlanganidek, Taraqqiyot strategiyasi xalqimiz farovonligini belgilovchi yettita yoʻnalishni oʻzida ifodalagan. Uning eng birinchisi va ahamiyatlisi, inson qadrini yuksaltirish va erkin fuqarolik jamiyatini yanada rivojlantirish orqali xalqparvar davlat barpo etishdan iborat. Shu maʼnoda amaldagi yilda inson omiliga eʼtibor yanada ortgani bejiz emas. Inson ulugʻlangan yurtda rivojlanish boʻladi, oʻsishga erishiladi.

Ikkinchi yoʻnalish adolat va qonun ustuvorligi tamoyillarini taraqqiyotning eng asosiy va zarur shartiga aylantirishga qaratilgan. Bundan sezish mumkinki, qonun ustuvorligi va konstitutsiyaviy qonuniylikni taʼminlash doimo dolzarb masala. Busiz taraqqiyotga erishib boʻlmaydi.

Ishtirokchilar tadbir davomida Oʻzbekistonning rivojlanish yoʻlini belgilovchi hujjat yuzasidan oʻzlarini qiziqtirgan savollarga javob oldilar. U yagona maqsad–inson qadri, farovon turmush, ayniqsa, kelajak avlod bunyodkorlari – yoshlarimiz uchun munosib shart-sharoit yaratishning asosi ekanligiga ishonch hosil qildilar.

“Adolat” SDP Andijon viloyat kengashi

Matbuot xizmati.