Tibbiy koʻrikdan qachon oʻtgansiz?

Soʻnggi yillarda mamlakatimizda aholi salomatligini mustahkamlash borasida qator tizimli islohotlar amalga oshirilmoqdaki, tibbiyot muassasalari, soha vakillarining zimmasidagi masʼuliyat hissi ortib, xalqimizning sogʻligʻi va xotirjamligini saqlash, kasalliklarni kamaytirish, oldini olish, sogʻlom turmush tarzini shakllantirish eng asosiy masalalardan biri boʻlib qolmoqda.

Tibbiyotda shunday kasalliklar uchraydiki, bular kam harakatlilik, semirib ketish, jismoniy tarbiya qilmaslik, kun boʻyi oʻtirish yoki yotish, dangasalik, sogʻlom turmush tarzi talablaridan bexabarlik, koʻp ovqat yeyish, yogʻli taomlarni koʻp isteʼmol qilish orqasidan kelib chiqadi. Biz shifokorlar bu haqida xalqimizga bong urishimiz, odamlarni toʻgʻri ovqatlanish va koʻp harakatlikka oʻrgatishimiz lozim.

Keyingi paytlarda aholi orasida insult, infarkt, osteoxondroz, qon bosimi, yaʼni qon-tomir kasalliklari, qandli diabet, uyqusizlik kabi kasalliklar keng tarqalmoqda. Bularning sabablaridan eng birinchisi, kam harakatlilikdir. Toʻgʻri va sogʻlom ovqatlanmaslik, yoshlarimizni jismoniy mehnatga oʻrgatmaslik, “Oʻz sogʻligʻing oʻz qoʻlingda” degan shiorga amal qilmaslik oqibatida bu kabi kasalliklar yanada keng quloch yoyishidan xavotir olishimiz kerak.

Nega shunday-a? Bir yilda bir marta shifokor huzuriga borishni ham chetga suramiz. “E, sogʻlomman-ku tibbiy koʻrikning nima keragi bor” deb aytishga oʻrganib qolganmiz. Agar kasallik sal xuruj qiladigan boʻlsa “oʻtib ketadi, oʻtib ketadi” deya oʻzimizni oʻzimiz ovutib yuraveramiz. Yoki oʻzimiz bilgancha, qoʻldan kelgancha davolashga kirishamiz. Qachonki ogʻriq jonimizdan oʻtsa shundagina tibbiyot sohasiga murojaat qilamiz.

Qaysi bir kasallikni tarixiga nazar solmang, avvallari shu boshogʻriq boʻlgan koʻplab kasalliklar asosan qirq yoshdan oshgan kishilarda, yosh ulugʻlarda kuzatilgan boʻlsa, bugun ularning yoshi ancha “yoshargan”.

Xulosa oʻrinda shuni aytish mumkinki, kasallikka chalinmaslik uchun har kungi badantarbiya mashqlarini kanda qilmang. Ertalab 15-20 daqiqalik jismoniy mashqlar uchun vaqtingizni ayamasangiz, turli muammolardan xoli boʻlasiz.

Abdulla Yusupov,

Xalq deputatlari Samarqand shahar Kengashi deputati.