Til millat xazinasi

“Adolat” SDP Qarshi tuman Kengashi va hamkor tashkilotlar tomonidan Yoshlar markazi tadbirgohida “ Til millat xazinasi” mavzusida tadbir boʻlib oʻtdi. Oʻzbekiston Respublikasining “Davlat tili haqida” gi qonun qabul qilinganligining 34 yilligi munosabati bilan tashkil etilgan bayram tadbirida pedagoglar, partiya faollari va keng jamoatchilik vakillari qatnashdi.

-Til-millat koʻzgusi, deb bejizga aytilmagan,- dedi partiya faoli , huquqshunos Bahorgul Namozova.- Negaki, unda oʻzbek xalqining olis oʻtmishidan tortib, to bugungi Yangi Oʻzbekistongacha boʻlgan davri,madaniyati, maʼnaviyati mujassam. Til har bir odamning onglilik, faollik darajasini belgilovchi omil ham sanaladi. Shu bilan birgalikda , u har qanday millatni dunyoga tanitadigan maʼnaviy asos, qolaversa uning muhim belgisi,uzviy va ajralmas bir boʻlagidir. Darhaqiqat, tillar-insoniyatning umumiy boyligi. Insonning tilini bilmasdan turib, u bilan fikrlashib boʻlmaydi. Zero, til bilgan-dil biladi. Boshqa bir xalqning madaniyatini anglash oʻrganish uchun ham oʻsha xalq milliy tilini bilish talab etiladi.

-Bizning oʻzbek tili dunyodagi eng qadimiy va boy tillardan biridir,- dedi xalq deputatlari viloyat Kengashi deputati Ruiddin Raupov.- Uning har tomonlama sofligi, purmaʼnoligi, taʼsirchanligi, serjiloligi, goʻzalligi, boyligiga oʻz hissamizni qoʻshishimiz zarur. Biroq, keyingi yillarda ona tilimizning sofligini, begʻuborligini asrashga yetarli eʼtibor berilmayapti. Viloyatimiz markazi Qarshi shahri va tumanlarda faoliyat yuritayotgan davlat korxona tashkilot muassasalari va tadbirkorlik shoxobchalari peshtoqidagi yozuvlar xorijiy tillarda bitilgani koʻngillarni ranjitadi.

Bunday tilga eʼtiborsizlikni hamma joyda ham kuzatishimiz mumkin.

Xalqimizning oʻz tiliga, eliga, vataniga boʻlgan cheksiz muhabbati, ijodkorlik qudrati til masalalariga milliylik nuqtai nazari bilan yondashishda namoyon boʻladi. Bu borada ulugʻ Navoiy bobomizning “Tilga ixtiyorsiz-elga eʼtiborsiz” degan xizmati necha asr oʻtsa ham oʻzining maʼno-mohiyatini yoʻqotmay kelyapti.

Ha, til – millatning yuragidir. Tadbirda oʻzbek tili Mavlono Lutfiy, Hazrat Alisher Navoiy, Bobur Mirzolardan to shu kunlargacha mashaqqatli va olis yoʻlni bosib oʻtgani xususida fikrlar bildirildi. Ota bobolarimiz orzu qilib kelgan tilimiz bugun davlat tili boʻldi. Shuning uchun ham hamma tilni hurmatlash odobini nutq madaniyatini oʻrganishi zarur. Shuni unutmaslik kerakki, ogʻzaki nutq madaniyatini mukammal bilish, oʻrganish, tilga hurmat — elga hurmat maʼnosida ham yuksak fazilat hisoblanadi.Shu maʼnoda bundan buyon joy nomlarini ham sof oʻzbek tilida yozilishiga alohida eʼtibor qaratmoq lozim.

  Sarvinoz Karimova,

Partiya faoli, Qarshi tumanidagi  

69-umumtaʼlim maktabi oʻqituvchisi.