“Toʻmaris izdoshlari” jamoaviy guruhlari faoliyati yoʻlga qoʻyiladi

Oʻzbekiston “Adolat” SDP Muzrabot tuman Kengashi va partiya tuman “Ayollar qanoti” Kengashi hamda tuman Ichki ishlar boʻlimi hamkorlikda tumandagi 33-IDUM yuqori sinf oʻquvchi qizlari ishtirokida Oʻzbekiston Respublikasi Vazirlar Mahkamasining joriy yil 19 yanvardagi 21-sonli Qarori ijrosi yuzasidan targʻibot tadbiri oʻtkazildi.

Tadbirda partiya Muzrabot tuman Kengashi va “Ayollar qanoti” Kengashi xodimlari, tuman IIB vakillari, deputatlar, BPT aʼzolari hamda 33-IDUM pedagog-oʻqituvchilari va yuqori sinf oʻquvchi qizlari ishtirok etishdi. Tadbirni oʻtkazishdan koʻzlangan maqsad “Ichki ishlar organlarining xotin-qizlar masalalari boʻyicha boʻlinmalari huzuridagi “Toʻmaris izdoshlari” jamoaviy guruhlari faoliyatini tashkil etish chora-tadbirlari toʻgʻrisida”gi Qaror xususida tushuntirishlar berishdan iborat edi.

Tadbirda maʼruzachilar tomonidan “Ichki ishlar organlarining xotin-qizlar masalalari boʻyicha boʻlinmalari huzuridagi “Toʻmaris izdoshlari” jamoaviy guruhlari faoliyatini tashkil etish chora-tadbirlari toʻgʻrisida”gi Hukumat Qarori qabul qilinganligi, qarorning maqsad va vazifalari, guruh aʼzolariga beriladigan imkoniyatlar toʻgʻrisida hamda oʻsmirlar jinoyatchiligi, oʻz joniga qasd qilish kabi salbiy illatlar toʻgʻrisida atroflicha tushunchalar berildi.

A.Qodirova, IIB tuman boʻlimi katta inspektori, tadbir ishtirokchisi:

-Joriy yil 1 iyundan yoshi 18 dan kichik va 30 dan katta boʻlmagan, umumiy oʻrta yoki oʻrta maxsus maʼlumotli, biriktirilgan hududda doimiy yashovchi hamda muloqotga kirishuvchan va tashkilotchilik qobiliyatiga ega xotin-qizlarni koʻngilli asosda jalb qilish orqali “Toʻmaris izdoshlari” jamoaviy guruhlari faoliyati tashkil etiladi. Mazkur guruhlarning asosiy vazifalaridan biri oʻrta, oʻrta maxsus va professional taʼlim muassasalarida oʻqiyotgan qizlarning xulq atvoriga salbiy taʼsir koʻrsatayotgan hamda ularning huquq va manfaatlari buzilishi bilan bogʻliq masalalarni aniqlashda koʻmaklashish hisoblanadi. Xotin-qizlar oʻrtasida huquqbuzarliklar profilaktikasiga va xotin-qizlarning huquq va erkinliklarini himoya qilishga munosib hissa qoʻshgan “Toʻmaris izdoshlari” jamoaviy guruhlari aʼzolariga Ichki ishlar vazirligi tavsiyanomasiga asosan huquq-tartibot organlarining OTMga saralashning barcha bosqichlaridan muvaffaqiyatli oʻtganidan soʻng yakka tartibdagi test sinovlarisiz kvota asosida oʻqishga kirish huquqi beriladi. Tadbirda shu xususda maʼlumotlar berib oʻtildi.

Tadbir davomida ishtirokchilar oʻzlarini qiziqtirgan savollariga mutasaddilardan tegishlicha javoblar olishdi.

Sayyora Berdiyeva,
Oʻzbekiston “Adolat” SDP
Muzrabot tuman “Ayollar qanoti” Kengashi faoli