Tolerantlik va millatlararo totuvlik – taraqqiyot omili

Yurtimizda tolerantlik va millatlararo totuvlik gʻoyalarining paydo boʻlishi qadim tarixga borib taqaladi. Xususan, Zardushtiylikda tolerantlik gʻoyalari mavjudligi haqidagi maʼlumotlar Markaziy Osiyo va Zardusht taʼlimoti tarqalgan qoʻshni hududlar tarixida yaqqol namoyon boʻladi. Maʼlumki, Zardushtiylikning “Ezgu fikr, ezgu soʻz, ezgu amal” gʻoyasi bagʻrikenglik va insonparvarlikka, bunyodkorlik va tinch-totuv yashashga chorlovchi muqaddas daʼvat boʻlib, ajdodlarimiz ruhiga singdi, turmush tarziga, eʼtiqodiga aylandi

Shunisi eʼtiborliki, bugungi kunda ham mamlakatimizda millatlararo totuvlik va bagʻrikenglikni taʼminlash, doʻstlik muhitini va koʻp millatli katta yagona oila tuygʻusini mustahkamlash, yoshlarni Vatanga muhabbat va sadoqat ruhida, milliy va umuminsoniy qadriyatlarga hurmat bilan qarash ruhida tarbiyalash, xorijiy mamlakatlar bilan madaniy-maʼrifiy aloqalarni kengaytirishga yoʻnaltirilgan keng miqyosdagi ustuvor yoʻnalishlar olib borilmoqda.

Amalga oshirilayotgan ustuvor yoʻnalishlar surʼatini, keng koʻlamli demokratik islohotlarni, siyosiy, iqtisodiy, ijtimoiy, maʼnaviy jihatdan erkinlashtirish va jamiyat hayotining boshqa jabhalarida erishilgan salmoqli muvaffaqiyatlar tahlili Oʻzbekiston xalqi yagona gʻoya — Oʻzbekiston Respublikasini rivojlantirishning ustuvor yoʻnalishlari boʻyicha olijanob maqsadlar va gʻoyat muhim vazifalarga erishishdan iborat yagona maqsad atrofida birlashganligini taʼkidlash uchun barcha asoslarni beradi.

Shu bilan birga, xalqaro va mintaqaviy munosabatlarda davom etayotgan globallashuv va transformatsiya, dunyoda iqtisodiy, siyosiy, milliy, diniy va boshqa ziddiyatlar kuchayib, axborot va kibermakonlarda qarama-qarshi kurash ortib borayotgan bir sharoitda millatlararo munosabatlar va xorijiy mamlakatlar bilan doʻstlik aloqalarini yanada rivojlantirish sohasida oʻz yechimini taqozo etayotgan bir qator dolzarb masalalar saqlanib qolmoqda.

Ayni paytda, dunyo boʻylab avj olayotgan terrorizm toʻlqini, uyushgan jinoyatchilikning oʻsishi, shaxslararo nizolarni, biznes yuzasidan kelishmovchiliklarni qurol yordamida hal qilishga urinishlar, shubhasiz, tolerantlik tamoyillarining qaror topishiga toʻsqinlik qiladi. Bugungi kun jamiyatda tolerantlik muhitini shakllantirish harakatlari tobora kuchayib bormoqda. Barchaga tolerantlik muammosining dolzarbligi ayon boʻlmoqda, shuning uchun bu muammoning yechimiga jiddiy eʼtibor qaratilmoqda.

Yurtboshimiz Sh.Mirziyoyev tashabbusi bilan ishlab chiqilgan 2022-2026 yillarga moʻljallangan Yangi Oʻzbekistonning Taraqqiyot strategiyasining 74-maqsadi diniy bagʻrikenglik va millatlararo totuvlikni taʼminlash sohasiga qaratilgan.

Qolaversa, Prezidentimiz Sh.Mirziyoyevning 2022 yil Oliy Majlisga yoʻllagan Murojaatnomasida ham “Millati, tili va dinidan qatʼi nazar, Oʻzbekistonni oʻzining Vatani deb biladigan, uning ravnaqi uchun hissa qoʻshib kelayotgan har bir fuqaro bundan buyon ham davlatimiz va jamiyatimizning eʼtibori va ardogʻida boʻladi. Millatlararo doʻstlik, diniy konfessiyalar oʻrtasidagi hamjihatlik, ijtimoiy bagʻrikenglik muhitini yanada mustahkamlash uchun bor kuch va imkoniyatlarimizni safarbar etamiz” deya taʼkidlab oʻtgan edilar.

Shu oʻrinda taʼkidlab oʻtish lozimki bugungi kunga kelib, mamlakatimizda millatlararo munosabatlarni yoʻlga qoʻyish borasida oʻziga xos amaliy ishlar qilinib, namuna boʻladigan darajada tajriba orttirildi. Bunda milliy oʻzlikni anglash, milliy gʻurur va milliy iftixor tuygʻusini tarbiyalash, millatlarning tili, madaniyati, urf-odat va qadriyatlarini asrab-avaylash, hurmat qilish, mamlakatdagi boshqa millat vakillarini ham manfaatlarini har tomonlama oʻylab, millatlarning umumiy birdamligini taʼminlashga erishilmoqda. Shu bois, Respublikamiz hududida istiqomat qilayotgan 130 dan ortiq millat va elat vakillari “Oʻzbekiston – umumiy uyimiz”, “Oʻzbekiston – yagona Vatan” shiori ostida yashamoqdalar va jamiyatning ijtimoiy-siyosiy hayotida faol ishtirok etyaptilar

Bugun ishonch bilan shuni ayta olamizki, yurtimizda millatlararo va konfessiyalararo totuvlikning noyob modelini yaratdik. Bizning jamiyatimizda koʻpmillatlilik va madaniy xilma-xillik xalqimizning maʼnaviy hamda maʼrifiy boyligining tugalmas qismi hisoblanadi. Mamlakatimizda millatlararo va davlatlararo totuvlikni yanada mustahkamlashga qaratilgan islohotlarni yangi bosqichga koʻtarilganligi doʻstlik va hamjihatlik qoʻrgʻonining yanada mustahkam boʻlishiga xizmat qiladi. Binobarin, bagʻrikenglik masalasi hamisha tinchliksevar Davlatimiz siyosatining asosini tashkil etib kelgan. Zero, bagʻrikenglik taʼminlangan yurtda tinchlik, barqarorlik hukm suradi hamda oʻzaro hamjihatlik, ishonch, hurmat kabi munosabatlar toʻliq qaror topadi.

Ilyos TOLLIBOEV,
partiya faoli