Toshkent IES: Qayta tiklanadigan energiya manbalarining salmogʻi oshiriladi

Hammamizga maʼlumki, energiya va energiya resurslari har qanday mamlakat iqtisodiyotining barqaror rivojlanishini taʼminlaydi. Shuningdek, aholi farovonligini belgilaydigan omillardan biridir. Mamlakatimizda qayta tiklanadigan energiya manbalaridan, jumladan, quyosh, shamol va suv energiyasidan foydalanishni kengaytirishga alohida eʼtibor qaratilgan.

Kuni kecha Prezidentimiz Shavkat Mirziyoyev raisligida hududlarda energiya taʼminoti va qayta tiklanuvchi energiya manbalarini joriy etish masalalari muhokamasi boʻyicha videoselektor yigʻilishi oʻtkazildi.

Unda taʼkidlandiki, mamlakatimizda energiya manbalarini koʻpaytirish va ulardan tejab foydalanish davlat siyosati darajasiga koʻtarildi. Oxirgi olti yilda 5 ming megavattdan ziyod yangi elektr quvvatlari yaratilgan. Joriy yilning yanvar-aprel oylarida qoʻshimcha 726 million kilovatt soat elektr ishlab chiqarilgan.

Shu bilan birga, bu yil 3 milliard 400 million kilovatt soat elektr energiyasi tanqis boʻlishi, yozning issiq kunlarida unga kunlik talab hozirgi 195 million kilovatt soatdan 255 million kilovatt soatga yetishi mumkinligi taxmin qilinmoqda.

Yigʻilishda ushbu talabni qoplash, elektr tarmoqlarining uzluksiz ishlashini taʼminlash choralari muhokama qilindi. Ushbu muammolarning yechimi sifatida quyosh panellari uchun kredit ajratishda aholi va tadbirkorlarni ragʻbatlantirish, ijtimoiy soha va davlat idoralarida kichik quyosh panellari oʻrnatish boʻyicha koʻrsatmalar berildi.

Energiya tejovchi texnologiyalarni joriy etish va qayta tiklanuvchi energiya manbalarini rivojlantirish borasida Toshkent issiqlik elektr stansiyasida ham rejali ishlar olib borilmoqda. Korxona ehtiyoji uchun zarur boʻlgan elektr energiyasini muqobil energiya manbalari asosida ishlab chiqishga alohida eʼtibor qaratilgan.

Ayni kunda elektr stansiyada umumiy quvvati 74 kVt boʻlgan quyosh panellari oʻrnatilgan boʻlib, korxonaning elektr energiyasiga boʻlgan ichki ehtiyojini qoplab kelmoqda. Xususan. korxonaning maʼmuriy binosi tom qismida 28 kVt, kimyo sexi suvni kimyoviy tozalash binosi tom qismida 52 kVt, avtogarajda 4 kVt boʻlgan quyosh fotoelektr paneli ishlab turibdi.

Birgina kimyo sexi suvni kimyoviy tozalash binosi tom qismiga oʻrnatilgan har birining quvvati 360 W boʻlgan 144 dona quyosh foto elektr panellarining umumiy quvvati 52 kVt tashkil etadi. Buning natijasida yiliga korxona ehtiyoji uchun sarflanadigan oʻrtacha 90 ming kVt.soat elektr energiyasi iqtisod qilinishiga erishilmoqda.

Dastlabki hisob-kitoblarga koʻra, korxonaning maʼmuriy tom binosiga oʻrnatilgan 28 kVtli quyosh panellari orqali yiliga oʻrtacha 30 ming kVt.soat elektr energiyasi ishlab chiqariladi.

Bugungi kunda korxona bosh binosining 1 chidan 4 qavatigacha boʻlgan yoʻlak va zinalarida 20 ta, 1-energoblokdan 12-energoblokkacha boʻlgan yoʻlak va zinalarida jami 184 ta sensorli yoritish datchiklari ishlab turibdi. Shuningdek, kimyo sexi va mazut xoʻjaligida har birining quvvati 100 kVt va 75 kVt boʻlgan chastota oʻzgartiruvchi qurilmalar, bundan tashqari, kimyo sexi, mazut xoʻjaligi hamda avtogaraj binosida xajmi 200 litr boʻlgan 5 ta quyosh suv isitkichlari ishlab turibdi.

Energiya tejamkorlikni oshirish, ekologik toza, noanʼanaviy va qayta tiklanuvchan energiya manbalaridan foydalanish koʻlamini kengaytirish orqali korxonaning iqtisodiy barqarorligi oshadi. Umumiy miqdorda korxonaga koʻra, oʻrnatilgan foto panellar orqali yiliga oʻrtacha 100 ming kVt. soat elektr energiyasi iqtisod qilishga erishiladi.

Gulnora Ahmedova,

 “Adolat” SDP Xalq deputatlari Toshkent viloyati Kengashi deputati,

“Toshkent IES”filiali direktorining ijtimoiy masalalar boʻyicha maslahatchisi.