Urganchlik faol ayollarga ehtirom koʻrsatildi

Urganch shahar IT-Park tadbirlar zalida Urganch shahar oila va xotin-qizlar boʻlimi tomonidan “Yil ayoli”, “Gender tenglik faoli”, “Hududning 100 nafar ixtirochi ayoli” respublika milliy tanlovlarining Urganch shahar bosqichi boʻlib oʻtdi.

Tadbirga hamkor tashkilotlar qatorida “Adolat” SDP Xorazm viloyat, Urganch shahar Kengashlari faollari ham ishtirok etishdi.

Tanlovni Urganch shahar hokimi oʻrinbosari, oila va xotin-qizlar boʻlimi boshligʻi Barno Berdiyeva kirish soʻzi bilan ochib berdi. Unda shahar miqyosida har jabhada faol ayollarning soni ortib borayotgani, mamlakatimiz rivoji uchun katta ahamiyatga ega ekani va boshqa koʻplab yutuqlar hamda kelgusi vazifalar toʻgʻrisida bir qator hayotiy misollar bilan gapirdi va har bir ishbilarmon ayol shahrimizni, millatimizni gʻururi ekani toʻgʻrisida eʼtirof etdi va tanlov ishtirokchilariga yuksak parvozlar tiladi.

Shundan soʻng partiyaning Xorazm viloyat kengashi matbuot kotibi, Oʻzbekiston jurnalistlar ijodiy uyushmasi aʼzosi, shoira, hakamlar hayʼati aʼzosi Zamira Abdullayeva soʻzga chiqib, Urganch shahar oila va xotin- qizlar boʻlimi rahbari Barno Berdiyeva yetakchiligidagi jamoaning shahrimiz ayollari orasida amalga oshirib kelayotgan namunali ishlariga toʻxtaldi va ularning partiyamiz bilan hamkorligi toʻgʻrisida asosli va hayotiy misollar bilan qayd etib oʻtdi. Shuningdek, soʻzga chiqqan boshqa hamkor tashkilotlar vakillari tomonidan mamlakatimizda xotin-qizlarga qaratilgan va yaratilayotgan salmoqli imkoniyatlar xususida gapirdilar.

Sheʼr va qoʻshiqlar, jozibador raqslar bilan yuqori darajada tashkil etilgan koʻrik-tanlov yigʻilganlarga koʻtarinkilik va ishchanlik kayfiyatini ulashdi.

Tadbir soʻngida, gʻoliblikni qoʻlga kiritgan va turli nominatsiyalarga ega boʻlgan faol ayollar tashakkurnoma va esdalik sovgʻalar bilan taqdirlandilar. Gʻoliblar koʻrik-tanlovning viloyat bosqichiga yoʻllanma oldilar.

 Xurjonoy Bekniyozova, tadbir ishtirokchisi: 

-Bugun hayotimda juda ham unutilmas kun boʻldi desam, xato boʻlmaydi. Shahrimizda oʻz ishining mohir ustalari boʻlgan ayollarning qobiliyatini har gal guvohi boʻlganimda, Oʻzbekistonimiz ayollari qadrlangan yurt ekaniga yana bir bora amin boʻlaman. Oilaviy kutubxonamni tashkil qilganimni qoʻllab-quvvatlab, Urganch shahar oila va xotin-qizlar boʻlimi hamda “Adolat” SDP Xorazm viloyat Kengashi tomonidan eʼtibor va ehtirom koʻrsatilganidan qalbim gʻururga toʻldi. Partiyaga koʻpdan qiziqishim sabab,   aʼzo boʻlish istagim ham amalga oshadigan boʻldi. Eʼtibor va ehtirom uchun Barno Berdiyeva, Manzura Jumaboyeva hamda Zamira Abdullayevalardan minnatdorman.

Bir soʻz bilan aytganda, urganchlik yoniq yurakli hamkor yetakchi ayollarimizning saʼy harakatlari bilan tashkil etilayotgan bu kabi koʻrik-tanlovlar, tadbir va davra suhbatilar, yakkama-yakka muloqotlar mamlakatimiz rivoji, aholining farovon turmush hayoti, oilalarning mustahkamligi, ayollarimizning jamiyatdagi roli va oʻrnini oshirishga xizmat qilishi bilan ahamiyatlidir.

                                                                                              Gulora Ismoilova,

    “Adolat” SDP Xorazm viloyat Kengashi mutaxassisi.