Uy-joyingiz qonun himoyasida

Sir emas keyingi yillarda shahar markazlaridan tortib tumanlarda ham asosiy yoʻl boʻylaridagi uylarning egalari bir hadik bilan yashayotgandi. Sababi, “sinos” deya bugun oilangiz bilan baxtli hayot kechirayotgan uy-joyingiz ertaga buzilmasligiga hech kim kafolat bermasdi. Ana shunday tashvish ortidan qancha oilalarning tinchi buzilganidan koʻz yumib boʻlmaydi.

Yangi tahrirdagi Konstitutsiyamiz bilan ayni shu muammo yechimini topmoqda. Endilikda bunday noqonuniy harakatlarga yoʻl qoʻyilmaydi. Konstitutsiyamizning 47-moddasida koʻrsatib oʻtilganidek, “ Har kim uy-joyli boʻlish huquqiga ega. Hech kim sudning qarorisiz va qonunga zid tarzda uy-joyidan mahrum etilishi mumkin emas. Uy-joyidan mahrum etilgan mulkdorga uy-joyning qiymati hamda u koʻrgan zararlarning oʻrni qonunda nazarda tutilgan hollarda va tartibda oldindan hamda teng qiymatda qoplanishi taʼminlanadi”.

Yana shuni qayd etish lozimki, davlatning oʻzi uy-joy qurilishini ragʻbatlantiradi va uy-joyga boʻlgan huquqning amalga oshirilishi uchun shart-sharoitlar yaratadi. Bunda aholining ijtimoiy jihatdan ehtiyojmand toifalarini uy-joy bilan taʼminlash alohida koʻzda tutilayotgani yanada eʼtiborli. Bir soʻz bilan aytganda, fuqarolarning uy-joyga egaligi qonun himoyasida boʻladi. Shu sabab jamoatchilik referendumda faol ishtirok etish bilan Konstitutsiyaviy qonun loyihasini qoʻllab-quvvatlashi shubhasiz.

Abliyor Qorayev,
“Adolat” SDP Marhamat tuman kengashi raisi.