Vakolat va masʼuliyat

Qishning sovuq kunlarida Xalq deputatlari Toshkent shahar Kengashi deputatlariga ham aholimizdan koʻplab murojaatlar kelib tushdi. Ular aholining sohadagi murojaatlarini joyiga chiqib oʻrganishdi. Sovuq kunlarda elektr energiyasiga boʻlgan talabning koʻpaygani transformatorlarning yonib ketishiga sabab boʻldi. Shuning uchun deputatlar ishni transformatorlarning hozirgi holatini oʻrganishdan boshlashdi. Dastlabki manzil Shayxontohur tumani boʻldi. Hududiy elektr tarmoqlari aksiyadorlik jamiyati Shayxontohur tumani elektr taʼminoti korxonasi mutaxassislarining maʼlumot berishicha, sovuq kunlarda 4 ta nim stansiya hamda 6 ta transformator yonib ketgan.

Tumanning “Katta Oqtepa” mahallasi Xumdonsoy kuchasiga yangi transformator oʻrnatilgan. Deputatlar uning ishlashini koʻzdan kechirishdi. Bir qaraganda hammasi yaxshi. Transformator meʼyorida ishlamoqda. Hatto, aholi ham xursand. Ammo deputatlar uning xavfsizligi taʼminlanmaganligiga eʼtiroz bildirishdi. Haqiqatdan ham transformator atrofi temir panjara bilan oʻralmagan va u maxsus joyga oʻrnatilmagan. Mutasaddilar ushbu muammoni tezda bartaraf etishga vaʼda berishdi.

Keyingi manzil tumanning “Beltepa” mahallasi boʻldi. Koʻp qavatli uylar oldidagi yonib ketgan transformator yangisiga almashtirilgan. Tuman elektr taʼminoti korxonasi mutaxassisi bu haqda batafsil maʼlumot berdi. Deputatlar koʻp qavatli uylarning ahvoliga javob beradigan boshqaruv kompaniyasi ishi bilan ham qiziqishdi. Ammo boshqaruv kompaniyasi rahbari “shunaqa boʻlsa kerak” degan javobni bera oldi, xolos.

Bu tumandagi muammolarning hammasi emas. Mahallada istiqomat qiluvchi fuqaro Habibulla Abdullayevning murojaatiga koʻra, uning uyidagi batareyalar sovuq shu sabab xonalar isimayotgan ekan. Holatni oʻrganish maqsadida deputatlar issiqlik va gaz taʼminoti korxonalari vakillari bilan birga fuqaroning uyini kirib koʻrishdi. U mahalladagi 3-uyda istiqomat qilar ekan. Fuqaro xonadoniga kirishar ekan, deputatlar uyning yoʻlaklari ham taʼmirtalab ekanligiga eʼtibor qaratishdi. Xonadonni koʻzdan kechira turib, mehmonxonaning batareyasi issiq, yotoq honani esa sovuq ekanligi qayd etildi. Bu muammoni bartaraf etish oʻrniga boshqaruv kompaniyasi raisi hamda issiqlik taʼminoti xodimi aybni bir-biridan qidirishdi. Deputatlarning fikrlaridan soʻng, ular muammoga yechim topishga vaʼda berishdi.

Deputatlar, shuningdek, Chilonzor tumanining 7-mavzesidagi “Bogʻizor” va “Oqtepa” mahallalarida joylashgan koʻp qavatli uylarning ham holatini oʻrganishdi. Manzilga yetib borganimizda uylar issiqlik saqlovchi maxsus plitalar bilan qoplanayotganiga guvoh boʻldik. Mazkur bazalt qoplama koʻp qavatli uylarni qishda sovuq, yozda issiq boʻlishdan saqlaydi. Chilonzor tuman Energiya taʼminoti mutaxassisining soʻzlariga koʻra, Oqtepa mahallasida 3300 dan ortiq isteʼmolchi bor. Ularning xonadonlarini energiya bilan taʼminlash maqsadida bu yerda ham yangi transformator oʻrnatilgan.

Bundan tashqari, deputatlar Uchtepa tumanidan tushgan murojaatni ham oʻrganishdi. Murojaatda aytilishicha, bu yerda ham elektr energiya va gaz boʻlmagan. Mutasaddilar sharoitni yaxshilash ustida ish olib borishayotganini aytishdi. Ularning soʻzlariga koʻra, muammoni bartaraf etish uchun yangi qozonxona ochish rejalashtirilgan. Bu esa tuman aholisini nafaqat elektr energiya, balki tabiiy gaz bilan ham uzluksiz taʼminlashga yordam beradi.

Xalq deputatlari Toshkent shahar Kengashi deputatlari aholining kommunal sohadagi murojaatlarini oʻrganishda davom etadi. Endilikda har hafta poytaxt tumanlaridan kelgan murojaatlar deputatlar tomonidan joyiga chiqib oʻrganiladi.

Husniddin Ergashev,

Xalq deputatlari Toshkent shahar Kengashi deputati.