Vakolatlar ishlash uchun berilgan

1. Deputatlikka nomzod sifatida taqdim etgan saylovoldi dasturingizning qaysi bandini bajardingiz?
2. Yaqinda uyushtirgan deputatlik soʻrovingiz va uning natijasi?
3. Saylov okrugingizda qachon oxirgi marta uchrashuv oʻtkazdingiz, saylovchilarning taklif va tashabbuslari nimalardan iborat boʻldi?
4. Siz saylangan hudud aholisining hal etilishi lozim boʻlgan eng muhim muammolari qanaqa? Nima uchun hal etilmayapti?
5. Deputatlikka nomzod sifatida taqdim etgan saylovoldi dasturingizning qaysi bandini bajardingiz?

Deputatlikka nomzod sifatida saylovchilarga “Adolat har bir inson uchun” deb nomlangan dasturimizni inson, uning huquqlari, erkinliklari va qonuniy manfaatlari davlat va jamiyatning eng yuksak qadriyatlari ekanligini, “Xalq davlat organlariga emas, balki davlat organlari xalqqa xizmat qilmogʻi kerak” gʻoyasi davlat siyosatining ustuvor yoʻnalishi ekanligini tan olib, fuqarolar, ayniqsa ayollar va bolalar huquq-manfaatlarini himoya qilish, siyosiy-huquqiy, ijtimoiy-iqtisodiy, gumanitar va boshqa sohalardagi islohot va yangilanishlarni izchil davom ettirishga qaratildi.

Joriy yildagi deputatlik faoliyatim davomida Bolalar xavfsizligini taʼminlash uchun okrugdagi umumtaʼlim maktablari atrofidagi avtomobil yoʻllarida amalga oshirilgan ishlarning holati, tezlikni cheklovchi, bolalar deb ogohlantiruvchi yoʻl belgilarining mavjudligi, yoʻl chiziqlari (zebra, ogohlantiruvchi va cheklovchi) chiziqlar chizilganligi va ularning holati, umumtaʼlim maktablari atrofidagi koʻchalardagi piyodalar uchun yoʻlakchalarning mavjudligi holatlarini oʻrganib chiqildi. Bundan tashqari umumtaʼlim maktablari atrofida taʼqiqlangan mahsulotlarning sotilishi, jumladan, tez tayyorlanadigan Fastfud mahsulotlari, taʼlim muassasalarida yaqin joylashgan   spirtli ichimliklar sotuvchi doʻkon va kafelarning mavjudligi, tamaki mahsulotlarining sotilishi, ularda savdo qoidalariga (18 yoshgacha sotmaslik) amal qilinish holatlari ahvoli bilan yaqindan tanishib chiqdim. Oʻrganish natijasida aniqlangan kamchiliklarni, mavjud muammolarni bartaraf etish yuzasidan shahar Kengashi doimiy komissiyalariga tegishli tashkilot rahbarlarining axboroti tinglandi. Mavjud muammolar yuzasidan shahar hokimligi va tegishli tashkilotlarga takliflar bilan chiqdim. Shuningdek, Qizil hududga kiritilgan mahalla fuqarolar yigʻinlari holati bilan tanishish, jinoyatchilik va huquqbuzarliklarning oldini olish, aholida norozilik paydo qilayotgan omillarni tanqidiy oʻrganib chiqib, holat yuzasidan shahar Kengashi sessiyasida koʻrib chiqildi va tegishli qarorlar qabul qilindi.

Saylov okrugim hududdagi ahvoli ogʻir boʻlgan 128-maktabgacha taʼlim muassasasini toʻliq rekonstruksiya qilish maqsadida manzilli dasturga kiritishga muvaffaq boʻldik. Shu bilan birga Samarqand shahridagi dorixonalarda dori-darmonlarning sifati, narx-navosi, ular tomonidan aholiga koʻrsatilayotgan xizmatlar holati, “Temir daftar”, “Ayollar daftari, va “Yoshlar daftar”lariga kiritilgan oilalarni qoʻllab-quvvatlash jamgʻarmalari mablagʻlarining sarflanishi yuzasidan jamoatchilik nazoratini oʻrnatish masalalari yuzasidan oʻrganishlar olib borildi. Oʻrganish jarayonlari toʻgʻrisidagi maʼlumotlar shahar Kengashiga taqdim etilib, doimiy komissiyalar kun tartibida muhokama etildi.

“Inson huquqlari va erkinliklariga hurmatni shakllantirish, tazyiq va zoʻravonliklarning oldini olishda mahalla fuqarolar yigʻinida amalga oshirilayotgan ishlar yuzasidan mutasaddi tashkilot rahbarlarining hisobotlarini”, hamda “Jinoyatchilik va huquqbuzarlik holatlarini keng muhokama qilish, uning oldini olishda Sudlarning tarbiyaviy-profilaktik rolini oshirishda mahallalarda, ish va xizmat joylarida, taʼlim muassasalarida amalga oshirilayotgan ishlar” xususida fuqarolik, jinoyat, iqtisodiy sudyalarning axborotini doimiy komissiyalarda eshitish bilan bir qatorda fuqarolarning huquqiy savodxonligini yuksaltirish, qonunlarga hurmat hissini shakllantirish borasida hamkorlikdagi ishlarni rejalashtirib oldik. Bundan tashqari, Samarqand shahar suv, gaz va elektr tarmoqlari korxona rahbarlari bilan saylov okrugim hududidagi mahalla fuqarolar yigʻinida ushbu sohalar boʻyicha mavjud muammolar va ularni bartaraf etish choralari yuzasidan suhbat olib bordim.

1. Yaqinda uyushtirgan deputatlik soʻrovingiz va uning natijasi?

Okrugdagi fuqarolar murojaati asosida 13, 20, 21, 86,87 — sonli deputatlik soʻrovlarini tegishli mutasaddilarga joʻnatdim. Jumladan, shahardagi “Qoʻshchinor” va “Xalqobod” mahalla fuqarolar yigʻinlari binosini kapital taʼmirlash, moddiy-texnika bazasini yaxshilash masalasi, okrugdagi “S.Ayniy”, “Gʻ.Gʻulom”, “Qoʻshchinor”, “Xalfa Ibrohim”, “Xoʻja Abdu Darun” MFYlarida istiqomat qiluvchi fuqarolar uchun jamoat transportini qaytadan tashkil etish masalasi, hududdagi 22-umumiy oʻrta taʼlim maktabi faollar zalini oʻrindiqlar bilan taʼminlash masalasi, “Qoʻshchinor” MFYga qarashli Dushanbe va Mirodilova koʻchalaridagi irrigatsiya masalasi yuzasidan deputatlik soʻrovlari bilan chiqdim.

Soʻrovlar natijasiga keladigan boʻlsak, Shahar xalq taʼlimi boʻlimiga 22-umumiy oʻrta taʼlim maktabi yuzasidan berilgan soʻrov ijobiy hal etilib, maktabning faollar zali toʻliq oʻrindiqlar bilan jihozlandi. Shahar xokimi F.Umarov nomiga berilgan jamoat transporti bilan taʼminlash soʻrovga asosan Sadriddin Ayniy va Termiz koʻchalariga 5-M-avtobus marshruti qoʻyildi.

Shu bilan bir qatorda obodonlashtirish, gaz va elektr taʼminoti boʻlimi rahbarlariga “Qoʻshchinor”, “Sadriddin Ayniy”, “Soʻzangaron” MFYlaridagi muammolar yuzasidan, shahar hokimining qurilish ishlari boʻyicha kotibiyat mudiriga “Abdulla Qahhor” va “Gʻafur Gʻulom” MFYlardagi koʻchalarni taʼmirlash boʻyicha ogʻzaki murojaatlar asosida “Abdulla Qahhor” va “Gʻafur Gʻulom” MFYlardagi koʻchalarni taʼmirlash ishlari amalga oshirildi.

Okrugdagi “Qoʻshchinor” MFYdagi fuqarolar bilan uchrashuvda bildirilgan muammolar, yaʼni irrigatsiya tizimini yaxshilash, koʻchalarni asfalt qilish, elektr energiyasidagi muammolar yuzasidan shahar hokimiga yuborilgan soʻrovga asosan shahar hokimining oʻrinbosari F.Najmiddinov tomonidan ushbu masala joriy yilning 3-choragi oxiriga qadar taʼmirlanishi rejalashtirilganligi toʻgʻrisida javob xati olindi.

3. Saylov okrugingizda qachon oxirgi marta uchrashuv oʻtkazdingiz, saylovchilarning taklif va tashabbuslari nimalardan iborat boʻldi?

Joriy yilning mart, aprel oylarida okrugdagi “Chashma”, “Xalfa Ibrohim”, “Abdulla Qahhor”, “Sadriddin Ayniy”, “Gʻafur Gʻulom”, “Qoʻshchinor”, “Soʻzangaron”, “Xoʻja Abdu Darun” MFYlarda istiqomat qiluvchi fuqarolar bilan uchrashdim. Ular bilan mamlakatimiz ijtimoiy-siyosiy hayotidagi yangiliklar, qonunchilikdagi oʻzgarishlar borasida fikr-mulohazalar almashdik. Ularni oʻylantirayotgan masalalar, qiynayotgan muammolar bilan oʻrtoqlashdik. Uchrashuvlarimiz davomida fuqarolar tomonidan juda koʻp takliflar oʻrtaga tashlandi. Xususan, yillar davomida ijtimoiy soha yoʻnalishlari boʻyicha mehnat qilib, nafaqaga chiqqan fuqarolarimizni sanatoriylar va sogʻlomlashtirish muassasalarida davolanishlari, sogʻliqlarini tiklash uchun imtiyozli yoʻllanmalar berilishidagi muammolarni bartaraf etish, ushbu yoʻllanmalarni ijtimoiy taʼminot boʻlimidan emas, kasaba uyushmasidan olish, sababi ijtimoiy taʼminot boʻlimida navbat kelishini 5-6 yil, yoki undan ham koʻproq kutishga toʻgʻri kelayotganligi xususida eʼtirozlar bildirildi. Bundan tashqari, fuqarolar tomonidan mahalla binosini taʼmirlash, aloqa va issiqlik tizimi bilan taʼminlash, kanalizatsiya, koʻchalarni asfalt qilish, ariq-zovurlarga lotok qoʻyish, yaroqsiz holga kelgan suv quvurlarini almashtirish, elektr simyogʻochlarni almashtirish masalalari koʻtarildi.

Ushbu uchrashuvda xalq qabulxonasi vakillari, shahar hokimi oʻrinbosari, moliya va iqtisodiyot boʻlimi xodimlari, obodonlashtirish, suv, elektr va gaz tashkilotlari mutaxassislari, mutasaddilar ham ishtirok etganligi menga deputatlik vakolatimni samarali amalga oshirishga qoʻl keldi. Aholi tomonidan bildirilgan takliflar, mavjud kamchiliklarni bartaraf etishda mutasaddilar koʻmagi zarurligini aytib, ular bilan suhbat asnosida kerakli chora-tadbirlarni kelishib oldim. Baʼzi murojaatlar yuzasidan mutasaddilarga deputatlik soʻrovi orqali murojaat qildim. Oʻylaymanki, ushbu takliflar eʼtiborga olinib, amaliyotga joriy etilsa, fuqarolarning bugungi kunidan rozi boʻlib yashashlariga xizmat qiladi.

4. Siz saylangan hudud aholisining hal etilishi lozim boʻlgan eng muhim muammolari qanaqa? Nima uchun hal etilmayapti?

Men saylangan 9 — Soʻzangaron saylov okrugi hududida “Qoʻshchinor” mahalla fuqarolar yigʻiniga qarashli Dushanbe, Mirodilova koʻchalardagi irrigatsiya tizimini yaxshilash masalasi deputat sifatida meni koʻp bezovta qiladi. Chunki, yogʻingarchilik paytida ushbu koʻchalarda istiqomat qiluvchi fuqarolar juda koʻp aziyat chekishadi. Bunga bir necha marotaba oʻzim guvoh boʻlganman. Albatta bu borada, mutasaddi idoralarga deputatlik soʻrovlari chiqarilib, ushbu tashkilot vakillari va fuqarolarning uchrashuvlarini tashkil qildim, mutasaddilar mavjud holat bilan yaqindan tanishtirildi. Natijada yuqorida qayd etilgan koʻchalaridagi ariq-zovurlar, irrigatsiya va kanalizatsiya tizimlari birmuncha tartibga keltirildi, Ammo, tizimdagi muammo hali toʻligʻicha bartaraf etilgani yoʻq. Mazkur masala yuzasidan deputatlik soʻrovimga shahar hokimining oʻrinbosari F.Najmiddinov tomonidan 2023-yil 17-maydagi 917/1334-sonli javob xatiga asosan joriy yilning 3-choragida muammo toʻliq bartaraf etilishi maʼlum qilingan. Umid qilamanki, ushbu muammo tez orada oʻz yechimini topadi.

Bundan tashqari, saylov okrugimga qarashli 6 ta mahalla fuqarolari yigʻinlarining ichki koʻchalarini asfalt qoplamasi bilan qoplash, elektr simyogʻochlarini almashtirish, noqonuniy qurilishlarni bartaraf etish, ijtimoiy soha obyektlarini tartibga keltirish, mahalla fuqarolar binolarini zamonaviy qiyofaga keltirish, ijtimoiy himoyaga muhtoj fuqarolarga murakkab jarrohlik amaliyotlarini oʻtkazishda yordam berish, ularning turmush farovonligini yuksaltirish kabi yechimini kutayotgan masalalar talaygina. Bu borada biz deputatlarning vazifasi hududdagi ijtimoiy-iqtisodiy masalalarni faqatgina oʻrganuvchi emas, masʼuliyatni zimmamizga olib, jarayonni ichida boʻlib, fidoiyga aylanish, masalaga yechim topishda tashabbuskor boʻlish ekanini unutganimiz yoʻq. Deputatlik vakolatim doirasida ushbu masalalarga yechim topish yoʻlida harakatdaman. Zero, saylovchilar, shu xalq bizga ishonib ovoz bergan ekan, uni oqlash zimmamizdagi masʼuliyatdir.

Muhiba Bababekova,

Xalq deputatlari Samarqand shahar Kengashi deputati.