Vardonzeda festeval

Liboslar – har bir xalq maʼnaviyati va tarixi bilan uzviy bogʻliq boʻlib, u milliy oʻziga xoslikni aks ettiradi. Milliy liboslarda xalqimizning tarixi, qadimiy urf-odat va anʼanalari, didi, estetik qarashlari mujassam etgan boʻlib, hozirgi kunda milliy liboslar jozibasini yoshlar oʻrtasida keng targʻib etish gʻoyat muhim ahamiyat kasb etadi.

Shu munosabat bilan bugun Shofirkon tumandagi “Qoʻrgʻoni Vardonze” yodgorligi joylashgan hududda tarixiy maskanlarimiz xususida targʻibot ishlarini olib borish, tumanda turizmni rivojlantirish, tuman tashkil etilganining 97 yilligini nishonlash maqsadida keng miqyosdagi festival oʻtkazildi.

Xalqaro turizm kuni munosabati bilan oʻtkazilgan festival davomida milliy liboslar, urf-odatlar, taomlar va kashtachi-hunarmandlar koʻrgazmasi, folklor dastalarining chiqishlari, dorbozlar, polvonlar musobaqalari, sport va xalq oʻyinlari tashkil etildi. Ayniqsa, xonatlas matosidagi liboslar oʻzbek ayollarining koʻrkiga-koʻrk chiroyiga-chiroy qoʻshadi. Festival ishtirokchilarining milliy libosdagi chiqishi barchaga yuqori kayfiyat hamda qadriyatlarimiz iforini baxsh etdi.

Shuningdek, Oʻzbek milliy taomi — palovni tayyorlash musobaqasida oʻzining pazandaligini koʻrsata olgan mahalla xotin qizlar faollari, tuman hokimi Alisher Fayzilloyev tomonidan mukofotlar topshirildi.

Bunday festivallarning oʻtkazilishi ichki turizm hamda tumanning turistik salohiyatini oshishiga, yoshlarda madaniy merosni oʻrganish va uni jamoatchilik orasida keng targʻib qilinishiga sabab boʻladi.

Zulfiya Ashurova,

Xalq deputatlari Shofirkon tuman Kengashi deputati.