Vobkentda “Konstitutsiya bilimdonining tuman bosqichi boʻlib oʻtdi

“Adolat” SDP Vobkent tuman Kengashi tomonidan tumanning 1-son kasb hunar maktabida “Vatan kelajagi yoshlar qoʻlida” loyihasi doirasida “Konstitutsiya bilimdoni” koʻrik-tanlovining tuman bosqichi tashkil etildi.

Mamlakatimizda yosh avlodni barkamol qilib tarbiyalash, ularning hayotga mustaqil qadam qoʻyishlari uchun barcha zarur sharoitlarni yaratishga qaratilgan tizimli ishlar amalga oshirilmoqda. Zero, yosh avlodda mustahkam vatanparvarlik gʻoyasini shakllantirish – kechiktirib boʻlmaydigan vazifa.

Ana shunday bunyodkor maqsadlarni oʻzida mujassam etgan bugungi koʻrik-tanlovda tuman kasb hunar maktablaridan oʻquvchilar qatnashib, oʻz bilimlarini sinovdan oʻtkazdilar.

Tadbirda ishtirokchi oʻquvchilar 3-bosqichda, belgilangan nizom hamda shartlar asosida oʻz chiqishlarini namoyish etdilar. Tanlov jarayonida hakamlar hayʼati oʻquvchilarning chiqishlarini ochiq, oshkora ovoz berish yoʻli bilan baholab bordilar.

Koʻrik-tanlov juda yuqori saviyada tashkil etilib, qizgʻin jarayonlarga, bahs-munozaralarga boy boʻldi.

Gʻoliblarga partiyaning faxriy yorliq hamda esdalik sovgʻalari topshirildi.

Mahbuba Roʻziyeva,

“Adolat” SDP Vobkent tuman Kengashi raisi.