Xalq bilan muloqot-bugunning talabi

Ayni kunlarda mahalliy kengash deputatlari xalq bilan yaqindan muloqot qilish, mavjud muammolarni oʻrganish va ularga yechim topish maqsadida oʻz saylov okruglarida aholi bilan yaqindan muloqotlar oʻtkazmoqda. Zero, xalq bilan muloqotlarda haqiqat yuzaga chiqadi, yechim topish harakatlari boshlanadi.

Xalq bilan yaqindan muloqotda boʻlmasdan, odamlar ichiga kirmasdan turib, joylarda kechayotgan ijtimoiy-iqtisodiy jarayonlarga, mavjud muammolarga, keng jamoatchilik oʻy-fikrlariga baho berib boʻlmaydi.

Xalq deputatlari Shoʻrchi tuman Kengashi deputati Oʻrol Sherxonov ham saylovchilar ishonchini oqlab kelayotgan deputatlardan biri. U saylovchilar koʻtargan masalalarni “boʻldi qilamiz, bajaramiz, dasturga kiritamiz”, deb quruq vaʼda bermaydi. Har bir murojaatni joyiga chiqib oʻrganadi, uni bartaraf etish choralarini koʻradi.

Xususan, deputat partiyaning “Muammo bilan yuzma yuz” loyihasi doirasida   Shoʻrchi tumanidagi “Jarqishloq” MFYda boʻlib har bir fuqaroning muammosini eshitdi, aholi murojaatlariga yuzaki qaramadi, aksariyat masalalar joyida ijobiy yechim topdi.

Deputatning mahalla ahli bilan uchrashuvi koʻtarinki kayfiyatda oʻtdi. Xalq vakili mahalla faollari ham bilan yuzma-yuz muloqot qilib, ularni oʻylantirayotgan masalalar bilan qiziqdi.

Maʼlum boʻlishicha, mahallada yashovchi Dilnoza Mamataliyeva subsidiya olib tadbirkorlik faoliyatini boshlagan holda mahalladagi ishsiz xotin-qizlarni kasb-hunarga oʻrgatib, ish bilan taʼminlamoqda. Xalq vakili u bilan suhbatlashib, muammolarini oʻrgandi. Faoliyatini kengaytirish boʻyicha zarur tavsiyalar, takliflar berdi.

Deputat koʻmagi bilan shu mahallada yashovchi M. Xoliqovga nogironlik aravachasi olib berildi. Ishsiz xotin-qizlar muammolari tinglanib, ularning salmoqli qismi shu yerning oʻzida hal etildi.

Shuningdek, “Jarqishloq” mahallasidagi fuqaro Hakimova Shahnozaning oliy oʻquv yurtida oʻqishi, kontrakt boʻlganligi uchun kontrakt pulini toʻlashda qiynalayotganligi sababli toʻlashda amaliy yordam soʻrab qilgan murojaati xotin-qizlar faoli bilan birgalikda oʻrganilib chiqildi va suhbat asnosida ushbu masalani hal qilib berishni Yoshlar agentligi oʻz zimmasiga oldi.

Shu kuni xalq vakili tumanda faoliyat yuritayotgan bir qator fermer xoʻjaliklarida boʻlib, mirishkorlar bilan muloqot qildi. Ularga qishloq xoʻjaligi sohasida olib borilayotgan islohotlar, fermer va dehqonlarga berilayotgan imkoniyatlar haqida atroflicha maʼlumotlar berdi.

Shuningdek, deputat ishsiz yurgan yoshlar, xotin-qizlarga tadbirkorlik faoliyatini boshlashlari uchun zarur tavsiyalar berildi.

Muloqotlar chogʻida hech bir fuqaroning murojaati eʼtibordan chetda qolmadi. Deputat aholi tomonidan turli sohalarga oid koʻtarilgan barcha murojaatlarni ijobiy hal etishga harakat qildi. Aksariyat muammolar tegishli tashkilot vakillari bilan birgalikda joyida bartaraf etildi.

Xalq vakilining saylovchilar bilan uchrashuvi davom etmoqda.

Dilafroʻz Rahmatova,

“Adolat” SDP Surxondaryo viloyat Kengashi

mafkuraviy ishlar boʻyicha bosh mutaxassisi.

.