Xalqimiz, Vatanimiz yoshlarga yuksak ishonch bilan qaraydi

Sir emas, bugunga kelib el-yurt manfaati, yaʼni inson – jamiyat – davlat tamoyili asosidagi islohotlar yangi O‘zbekistondagi tarixiy o‘zgarishlar bosh mezoniga aylanib ulgurdi. Prezident Shavkat Mirziyoyevning lavozimga kirishish tantanali marosimdagi nutqidan mana shu qatʼiy xulosani yaqqol anglash mumkin.

Davlatimiz rahbarining samimiy eʼtiroflarga va yangi tashabbuslarga boy nutqini katta qiziqish bilan tingladik. Zero, shu jarayonda o‘zimizning faoliyatimizga baho berdik va istiqboldagi vazifalarimizni ich-ichimizdan teran his etdik.

Mazkur nutqni kelgusi yetti yilda amalga oshirilishi belgilangan va mazmun-mundarijasi hududlardagi saylovchilar, umuman, xalqimiz bilan bamaslahat tayyorlangan taraqqiyot dasturining mustahkam asosi, desak, ayni haqiqatni aytgan bo‘lamiz. Ishonch bilan aytish mumkinki, yaqin istiqbolda yangi O‘zbekiston uchun barcha sohalarda tub burilish va ulkan o‘zgarishlar davri bo‘ladi. Negaki, davlatimiz rahbari taʼbiri bilan aytganda, “Har bir kun — bu imkoniyat, har bir kun — bu kelajak poydevori” degan qatʼiy talab har qaysi rahbarning, barcha xalq noiblari, vazir va hokimlarning kundalik faoliyat dasturiga aylanadi.

Maʼlumki, taʼlim va tarbiya, sog‘liqni saqlash, ilm-fan, madaniyat va sanʼat, sport sohalarini rivojlantirish, yangi uy-joylar qurish, xullas, Prezident nutqida to‘xtalib o‘tilgan barcha masalalar aslida yoshlar hayoti, buguni va ertasi bilan chambarchas bog‘liq.

Nutqda shu haqda so‘z borarkan, tadbirkorlik uchun yana-da qulay sharoit va imkoniyatlar yaratish, yangi-yangi ish o‘rinlari ochish, aholi daromadlarini ko‘paytirish, yoshlar va xotin-qizlarni zamonaviy kasb-hunarlarga o‘qitish, ular bandligini oshirish hamisha eʼtibor markazida bo‘lishi urg‘ulandi.

Ushbu yo‘nalishdagi ishlar allaqachon boshlangan bo‘lib, har bir o‘g‘il-qiz maktabni bitirayotganda kamida ikkita kasb-hunar egallashi, ikkita xorijiy tilni bilishi va bitta musiqa cholg‘usidan xabardor bo‘lishi uchun zarur sharoit yaratilmoqda. Bu jarayonda biz bozor tamoyillariga asoslangan kuchli iqtisodiyot barobarida ajdodlarimizning boy merosi va milliy qadriyatlarga asoslangan kuchli maʼnaviyatga tayanamiz. Negaki, iqtisodiyot va maʼnaviyat qushning ikki qanoti kabi nihoyatda zarur omillardir. Har ikki qanot teng tebrangandagina yuksaklarga parvoz qilinadi. Shuning uchun ham milliy o‘zligimiz va ezgu qadriyatlarimizni asrab-avaylash, madaniyat, maʼnaviyat va maʼrifat sohalarini rivojlantirish, yosh avlodni Vatanga muhabbat va sadoqat ruhida tarbiyalash masalasi kun tartibimizdan hech qachon tushmaydi. Prezidentimiz, xalqimiz, Vatanimiz esa yoshlarga yuksak ishonch bilan qaraydi. Yoshlikni, vaqtni  g‘animat bilib, izlanish va intilishdan aslo to‘xtamagan avlodga, albatta, baxtu omad doimo hamroh bo‘ladi!

Takror bo‘lsa aytmoqchimizki, oxirgi olti-yetti yil davomida O‘zbekistonda tub o‘zgarishlar kirib bormagan hudud, tarmoq, yo‘nalish qolmadi. Bu, inson huquq va manfaatlarini taʼminlash sohasi bo‘ladimi, pragmatik ichki va tashqi siyosatmi, iqtisodiyotni erkinlashtirishmi, taʼlim yoki tibbiyot, ijtimoiy himoya tizimimi, xullas, barcha yo‘nalishda soatlab aytish mumkin bo‘lgan yangiliklar ko‘p. Endigi vazifa shu yutuqlarni yana-da mustahkamlash bilan bog‘liq. Yaʼni yorug‘ istiqbolga ko‘z tikib turgan millionlab insonlar — ota-onalarimiz, opa-singillarimiz, o‘g‘il-qizlarimiz umid va ishonchini oqlash, bizning nafaqat vazifamiz, balki insoniy burchimizdir.
 

Dilorom TOSHMUHAMEDOVA,
Oliy Majlis Senatining
Yoshlar, madaniyat va sport masalalari
qo‘mitasi raisi o‘rinbosari.