Xivalik deputatimiz oilalarga quvonch ulashmoqda

Deputatlarning saylovchilari oldidagi burch va masʼuliyatini his qilib faoliyat olib borishlari oʻz navbatida, fuqarolarni yashash sharoitini yaxshilashga xizmat qilishi hech kimga sir emas. Ayniqsa, saylovchilari salomatligini qaygʻurib, ularni qiynab kelayotgan muammolarini bartaraf etilayotgani, bemorlarni sogʻlom hayotga qaytarishdek vazifani ado etish orqali koʻplab oilalarga quvonch ulashilayotgani tahsinga sazovordir.

Xiva tuman Kengashi Maqsud Eshniyazov ana shunday jonkuyar, lafzi halol xalq noyiblaridan hisoblanadi. Uning xalqimiz salomatligi yoʻlida olib borayotgan urinishlari har bir dardmand yuraklarga malham boʻlmoqda.

Deputatning saylovchilari orasidagi ezgu amal ishlarini Xiva tuman “Shayh Najmiddin Kubro” mahallasi faollari nomidan deputatga bildirilgan minnatdorlik xatida ham koʻrish mumkin.

Taʼkidlanishicha, deputat – Maqsud Eshniyazov deputatlikka saylanganidan buyon, mahallaga kelib saylovchilari bilan tez-tez muloqotlar olib borgan va ularni koʻpdan qiynab kelayotgan muammolarini ijobiy hal qilishga erishgan. Kam taʼminlangan oilalarning jarrohlikka zaruriyati boʻlgan bemor aʼzolarida davlat hisobidan jarrohlik amaliyotini beminnat amalga oshirib kelmoqda.

Muqaddas Matchanova, saylovchi:-Turmush oʻrtogʻim Hurmat Matkarimovning koʻpdan sogʻligʻi yaxshi emasligi tufayli aziyat chekib kelayotgan edi. Ayniqsa, moddiy tomondan qiyinchiliklar turmush oʻrtogʻimni dovalatishga toʻsiq boʻlayotgan bir paytda, deputatimiz Maqsud Eshniyazov muammolarimizni yechib berdi. Turmush oʻrtogʻimda   jarrohlik amaliyoti bajarishdi va sogʻligini tiklashdi. Deputatimiz biz kabi qanchadan-qancha oilalarga xursandchilik bagʻishlamoqda. Minnatdormiz.

Bir soʻz bilan aytganda, xalqimiz dardi bilan yashayotgan Maqsud Eshniyazov kabi koʻplab deputatlarimizning xayrli ishlariga guvoh boʻlmoqdamiz. Ularning izchillik bilan olib borayotgan ezgu ishlari yordamga muhtoj oilalarni yashash sharoitini yaxshilash orqali mamlakatimizda inson qadri ulugʻ tamoyilini amalga oshirishda ahamiyati kattadir.

                                                                                 Shukuroy Madaminova,

     “Adolat” SDP Xiva tuman Kengashi raisi.