Xorazmda Qonun loyihasi muhokamasiga qaratilgan tadbirlar qizgʻin pallada

Ayni kunlarda, Oʻzbekiston “Adolat” SDP Siyosiy Kengashining topshirigʻiga binoan, partiyaning Xorazm viloyat Kengashi hamda shahar va tuman Kengashlari tomonidan umum oʻrta taʼlim maktablarida, Maktabgacha taʼlim tashkilotlari hamda Mehribonlik uylarida bolalarga nisbatan tazyiq va zoʻravonlik oʻtkazishning oldini olishga qaratilgan huquqiy mexanizmlarni kuchaytirish boʻyicha “Bolalarni zoʻravonliklarning barcha shakllaridan himoya qilish toʻgʻrisida”gi Oʻzbekiston Respublikasi Qonuni loyihasining muhokamalariga bagʻishlangan tadbirlar uyushqoqlik bilan tashkil etilmoqda.

Xususan, Xiva tumanidagi 28-umum oʻrta taʼlim maktabida partiya faollari, deputatlari, hamkor tashkilot vakillari ishtirok etgan tadbir yuqorida qayd etilgan Qonun loyihasi muhokamasiga bagʻishlandi.

Tadbirda soʻzga chiqqan partiya faollari tomonidan ushbu Qonunning maqsadi, mazmun va mohiyati toʻgʻrisida tushunchalar berildi. Qonunni qabul qilishdan asosiy maqsad- bolalarni zoʻravonlikning barcha shakllaridan himoya qilish sohasidagi munosabatlarni tartibga solishdan iborat ekani taʼkidlandi.

Shuningdek, Qonun loyihasi muhokamasi qizgʻin kechgan tadbirda bolalarga ruhiy va jismoniy zoʻravonlik oʻtkazgan bolalar bilan ishlash sohasidagi xodimga nisbatan qatʼiy chora qoʻllanilishi, bolalar bilan birga ishlaydigan barcha idora tashkilotlarga kuzatuv kamerasini oʻrnatib, nazoratini jamoatchilik nazoratiga yuklash zarurligi va shu kabi bir qator takliflar oʻrtaga tashaldi.

 Tumanda bu kabi tadbirlar davom etadi.

                                                                                            Shukuroy Madaminova,

                     “Adolat” SDP Xiva tuman Kengashi raisi.