Xorazmda “Shayx Sanʼon” musiqali dramasining taqdimoti boʻlib oʻtdi

Soʻngi yillarda Davlatimiz tomonidan milliy teatriga yanada katta eʼtibor qaratilib, keng imkoniyatlar berilayotgani soha rivoji hamda teatr jamoasi uchun ish samaradorligini oshirishga   xizmat qilmoqda.

Xorazm musiqali drama teatrida A.Navoiyning “Lison ut-tayr” asaridagi “Shayx Saʼnon” qissasi asosida Shokir Murodov inssenirovkasining   taqdimoti boʻlib oʻtdi.

Taqdimotga respublikaning barcha joylaridan ekspert va mutaxassislar, teatrshunoslar, shoir va dramaturglar, “Adolat” SDP Xorazm viloyat Kengashi faollari hamda ommaviy axborot vositalari vakillari ishtirok etishdi.

Tadbirda soʻzga chiqqanlar tomonidan namoyish etilgan “Shayx Saʼnon” musiqali dramasiga ijobiy munosabatlar bilan bir qatorda musiqali dramaning ayrim joylari   yanada mukammal sayqallanishi kerakligi xususida bir qator takliflar bildirishdi va jamoaga sharafli va mashaqqatli ishlarida kuch-quvvat tilashdi.

Partiyaning Xorazm viloyat Kengashi matbuot kotibi, Oʻzbekiston jurnalistlar ijodiy uyushmasi aʼzosi, ijodkor- shoira Zamira Abdullayeva soʻzga chiqib, qadimdan mashhur boʻlgan Shayx Sanʼon qissasi ibrat jihatidan juda muhim ekani, ushbu jihatlar aktyorlarning kuchli mahorati, isteʼdodi bilan   hayratlanarli darajada ijro etilgani toʻgʻrisida eʼtirof etib, musiqali dramaning kelajagi porloq ekani va xalqimiz eʼtiboridan munosib oʻrin olishiga ishonch bildirdi.

Gulora Rahimova, Oʻzbekiston Respublikasi xalq artisti, musiqa drama maqomchisi:

-Teatr sohasida koʻp yillardan buyon xizmat qilib kelmoqdaman. Sohani rivojlanishida va koʻplab yutuqlarga erishishimiz davlatimiz tomonidan berilayotgan imkoniyatlardan samarali foydalanayotganimizdadir. Avvallari sovuq, sharoiti yaxshi boʻlmagan joyda ishlashimiz ancha qiyin boʻlgan. Hozirgi kunda barcha sharoitlar yaratilgan.Shayx Sanʼon musiqali dramani ahil va hamfikr jamoamiz bilan ijro etish jarayoni hayotimizda eng unutilmas kunlar boʻldi desam, mubolagʻa emas.

Soʻzga chiqqanlar tomonidan, Xorazm musiqali drama teatri rahbari, partiyamizning faoli Dinara Ibragimova rahbarligidagi jamoaning yurtimiz kelajagi yoʻlidagi mehnatlari orqali xalqimiz qalbidan munosib joy egallab kelayotgani bir nechta hayotiy misollar bilan taʼkidlandi.

Bir soʻz bilan aytganda, asarda aks etgan bu voqea talqini tomoshabinlar eʼtirofiga sazovor boʻlishi bilan bir qatorda oʻrnak va saboq hamda diniy-tarbiyaviy ahamiyati katta ekani dramani namoyish etish jarayonida oʻz ifodasini topdi.

                                                                                Gulora Ismoilova,
“Adolat” SDP Xorazm viloyat Kengashi mutaxassisi.