Xotin-qizlar muammolari hal etilmoqda

Mamlakatimizda mahallabay va fuqarobay tizimi asosida xalq bilan muloqot qilish, joylardagi muammolarni oʻrganish va ularning yechimini topish borasida amalga oshirilayotgan ishlar aholining turmush farovonligini oshirishga xizmat qilmoqda.

Ayni shu maqsadda, Xalq deputatlari Jarqoʻrgʻon tuman Kengashi deputati Shukur Bazarov tashabbusi bilan 23-Madaniyat saylov okrugi hududidagi “Madaniyat” mahallasi faollari va Sektor shtabi aʼzolari ishtirokida uyma-uy yurib, mahalladagi “Ayollar daftari”ga kiritilgan 21 nafar xotin-qizlar muammolari oʻrganildi.

Oʻrganish davomida xotin-qizlar bandligini taʼminlashga koʻmaklashish maqsadida 5 nafar ayollar deputat tomonidan tikish va bichish korxonalariga ishga taklif etildi. Tegishli mutaxassislar tomonidan 1 nafar ayolga huquqiy va 2 nafar ayollarga psixologik yordamlar berildi.

Uy sharoitida tikuvchilik faoliyatini amalga oshirish istagini bildirgan 3 nafar ayollarga imtiyozli ravishda tikuv mashinasi olish uchun sektor shtabiga hujjatlar topshirildi.

-Hozirda 25 nafar xotin-qizni ish bilan taʼminlashga muvaffaq boʻldik, – deydi partiya faoli, ishchi guruh aʼzosi Ochil Jiyanov. – Ularning 8 nafari “Ayollar daftari”ga kiritilgan. Oʻzbek xotin-qizlari mehnatkash, har qanday kasb-hunarni tezda oʻrganib, mustaqil ravishda ishlab keta oladi. Mahalla qizlaridan 15 nafarini oʻquv markazlarimizda ularga tikuvchilik va toʻquvchilikni oʻrgatyapmiz. Kelgusida ular ham oʻz tadbirkorligini yoʻlga qoʻyishlari mumkin.

“Mahallabay” tizimidagi bu kabi amaliy ishlar davom ettirilmoqda.

Qizlarshoy Rahmatova,

Xalq deputatlari Jarqo‘rg‘on tuman Kengashi deputati