Xotin-qizlar muammolari manzilli oʻrganilib yechim topilyapti

“Adolat” SDP Chiroqchi tuman Kengashi va tuman xotin-qizlar qoʻmitasi tomonidan Chiyal MFY tadbirgohida “Xotin-qizlarni kasbga yoʻnaltirish – dolzarb masala” mavzusida tadbir boʻlib oʻtdi. Unda mahalliy Kengash deputatlari, partiya faollari, xotin-qizlar tashkilotlari aʼzolari, tumandagi 10 ga yaqin MFY lar vakillari qatnashdi. Yuzma-yuz muloqot tarzida boʻlib oʻtgan tadbirda ayollar Kengashi faoli Shahlo Tursunova maʼruza qildi.

Shu kecha kunduzda mamlakatimizda umrguzaronlik qilayotgan jami aholining qariyb 17 millionini xotin-qizlar tashkil etadi,-dedi Shahlo Tursunova.

-Prezidentimiz saʼy-harakatlari bilan ularning manfaatlarini taʼminlash, jamiyat hayotidagi oʻrnini mustahkamlashga davlatimiz ijtimoiy siyosatining muhim yoʻnalishi sifatida qaramayapti. Hozirgacha bu borada 2 ta qonun, davlatimiz rahbarining 6 ta farmoni va qarori qabul qilindi.

Oliy Majlis Senatida ayni paytda xotin-qizlar va gender tenglik masalalari boʻyicha qoʻmita faoliyat olib bormoqda. 1 ming 400 nafar xotin-qizlarimiz respublika miqyosida rahbarlik lavozimlarida faoliyat olib borayotgan boʻlsa, birgina bizning viloyatimizda ham hozir ularning safi kun sayin kengayib bormoqda. Qariyb ming nafarga yaqin xotin-qizlar turli yoʻnalishlarda rahbarlik lavozimlarida ishlashyapti.

Tadbirda soʻzga chiqqanlar “Adolat” SDP va hamkor tashkilotlar tomonidan birgina oʻtgan oyda mingga yaqin oilalarga tashrif buyurilib , 9 ta mezon asosida ulardagi manzilli muammolar oʻrganilgani, 150 nafardan ziyod xotin-qizlarga kredit olishlariga koʻmaklashilgani, 73 nafar uyda oʻtirgan ayollar kasb yoʻnalishida oʻqitilganini qayd etishdi. Shuningdek, partiya tashkilotlari va hamkor tashkilotlarning begʻaraz koʻmagi tufayli 83 nafar ayollar mavsumiy ishlarga jalb etilgan. 53 nafar opa-singillarimiz esa tikuvchilik, qandolatchilik, sartaroshlik va boshqa yoʻnalishlarda oʻz tadbirkorliklarini yoʻlga qoʻyib olishdi.

Tadbirda ayollarni ish bilan taʼminlash, ularni har tomonlama ijtimoiy jihatdan qoʻllab-quvvatlash, tibbiy va psixologik yordam qamrovini kengaytirish, oilaviy kelishmovchiliklar va ajralishlarning oldini olish xususida ham fikr yuritildi.

Sobir Ahmedov,

“Adolat” SDP Chiroqchi tuman Kengashi raisi.